798 Бардыгы /

ЖАЛАЛ-АБАД. Тогуз-Торо РИИБи тарабынан мектеп окуучулары арасында топтошуп мушташуулардын жана түрдүү кырсыктардын алдын алуу максатында атайын графиктин алкагында түшүндүрүү иштери жүргүзүлүүдө. Бул тууралуу Жалал-Абад ОИИБдин Басма сөз кызматы маалымдады.

Маалыматка ылайык, район аймагындагы №3, №4, №6 орто мектептеринде аймактык участкалык инспекторлор, жашы жете электер менен иштөө инспекциясы жана жол кыймылынын коопсуздугун көзөмөлдөө бөлүмүнүн кызматкерлери окуучуларды мыкты билим алып, мекенибиздин тынчтыгы, өнүгүүсү үчүн салым кошууга чакырышты.

Ошондой эле Казарман айылындагы №1 Тоту Мойдунов орто мектебинде мугалимдер менен биргеликте “Кылмыш, кылмыштын арты жаза, жазанын арты өкүнүч” аталышындагы тегерек стол болуп өттү. Жолугушууга 40 ата-эне, 50 окуучу катышып, жаш өспүрүмдөр арасында орун алып жаткан учурдун көйгөйлүү маселелери талкууга алынды.

Мындан сырткары Ноокен РИИБнин кызматкерлери тарабынан кылмыштуулуктун алдын алуу, зордук-зомбулукка каршы 16 күн акциясы башталды. Алгачкы жыйын Ноокен районунун акиминин орун басары Зияда Юлдашева жана ата-энелердин катышуусунда болуп өттү. Жыйындын жүрүшүндө милиция кызматкерлери тарабынан өспүрүмдөр арасында эрте никеге туруунун терс жактары айтылып, мектептен сырткары убакыттарда ата-энелерди өз балдарына көзөмөл кылуу керектиги белгиленди.

Ал эми Чаткал РИИБи райондук аскер комиссариаты менен биргеликте Каныш-Кыя айыл аймагында жайгашкан С.Байдөөлөтов орто мектебинин 10-11-класстарын ок атуучу куралдар менен тааныштырышып, иштөө механизмдерин көрсөтүштү. Милиция кызматкерлери жаштарды мекенди коргоого жана сүйүүгө, эр жүрөктүүлүккө чакырышып, келечекте мыкты кесиптин ээси болууга үндөштү. Мындай профилактикалык иш-чаралар алдыңкы күндөрү район аймагындагы башка мектептерде да улантылмакчы.

“Аймак”