1,341 Бардыгы /

ЖАЛАЛ-АБАД. Өкмөттүн Жалал-Абаддагы ыйгарым укуктуу  өкүлү Кыянбек Сатыбалдиев Жалал-Абад облусттук балдар психо-неврология социалдык стационардык борборунун реабилитациялык  бөлүмүнүн жаңы имараты менен таанышты.

Борбордун реабилитациялык бөлүмү 2 кабаттуу болуп, балдарга ыңгайлуу шарттар жана заманбап техникалык жабдуулар менен камсыздалган.

Облусттук балдар психо-неврология социалдык стационардык борборунун реабилитациялык  бөлүмүнүн жетекчиси Дамира Алимжанова бул тууралуу төмөнкүдөй билдирет.

–Ушундай жакшы имаратыбыз бүтүп, эмерек алынсын деп каражат бөлүндү. Бул жер реабилитациялык бөлүм болуп, күндүзгү бөлүм да ачылат. Шаардагы аярлуу катмардагы балдары бар жарандарыбыз балдарын алып келишет. Алар балдарды дарыгерлерге көргөзүп, массаж кылганды, туура тамактандырып үйрөтүп деги эле реабилитациялык борбор болот,- дейт Д.Алимжанова.

Имараттын курулушуна республикалык бюджеттен жалпы 100 млн 380 миң сом сарпталып, ал эми эмеректерди алууга 48 млн сомго тендер жарыяланган. Керектүү эмеректер алынган соң, борбордун 2020-жылдын алгачкы айларында ачылышы пландалууда.

Эске сала кетсек, аталган имараттын курулушу Кыргыз өкмөтү менен Евросоюз келишиминин негизинде 2017-жылы башталган. Курулуш 2019-жыл “Региондорду өнүктүрүү жана өлкөнү санариптештирүү жылынын” алкагында аяктаган.

Акылай КАРАБАЕВА, “Аймак”