2,804 Бардыгы /

ЖАЛАЛ-АБАД. 3-декабрь эл аралык мүмкүнчүлүгү чектелгендердин күнүнө карата Жалал-Абаддагы “Кыргыз азиздер жана дүлөйлөр” коомунун ишмердүүлүгү менен тааныштык. Коомдун мүчөлөрү кышкы куртка, атайын кийимдер, төшөк, матрац, жаздыктарды тигишет.

Учурда коомдо 181 мүчө катталган, 93ү көзү азиздер, 88и угуу жагынан майыптар. Анын  ичинен 28 адам эмгектенип келишет.

Аталган коомдун директору Үсөнбай ажы Печелов мүмкүнчүлүгү чектелгендер жасаган буюмдар сатылса, алардын да өзүнүн керек-жарагына жетип калмак деген пикирин билдирди.

-“Кыргыз азиздер жана дүлөйлөр” коомунун милдети Жалал-Абад шаарындагы майыптарды жумуш менен камсыз кылуу. Көзү азиздер жалаң төшөктөрдү колдо тигет, ал эми угуу жагы боюнча майыптарыбыз  тигүүчү машинелер менен тигишет. Андан сырткары биз эмерек цехин да ачканбыз, анда угуу жагы боюнча майыптар иштеп жатат.Биз мамлекеттик-бюджеттик мекемелер менен иштешебиз. Себеби өкмөттүн майыптарды камсыздандыруу боюнча токтому чыккан. Анда мекеме-ишканалар  майыптар жасаган өздөрүнө керектүү буюмдарды алышсын делет. Ошого байланыштуу мекеме-уюмдар менен келишим түзүп, аларга керектүү буюмдарды сапаттуу чыгарып берип жатабыз. Негизи кышкы куртка, атайын кийимдер, төшөк, матрац, жаздык, шейшептерди тигип чыгарабыз”-дейт Үсөнбай ажы Печелов.

Андан сырткары аталган коом 3-декабрь эл аралык майыптар күнүн белгиледи. Ага вице-мэр Руслан Алтымышев катышып, мүмкүнчүлүгү чектелгендерге каалоо-тилегин айтып өттү. Аталган коомдун мүчөлөрүнө чай үстүндө майрамдык чакан концерт тартууланды.

Акылай КАРАБАЕВА, “Аймак”