1,461 Бардыгы /

Өкмөттүн Жалал-Абад областындагы ыйгарым укуктуу өкүлчүлүгүндө областтык координациялык кеңешме өттү.

Кеңешмеге өкмөттүн Жалал-Абаддагы ыйгарым укуктуу өкүлү Кыянбек Сатыбалдиев баштаган жетекчилер, район,шаарлардын аким, мэрлери,укук коргоо органдарынын башчылары, областтык билим берүү тармагынын жетекчилери катышты.

Анда областтын аймагында жашы жете элек өспүрүмдөр арасында кылмыштуулуктун, балдарга карата ырайымсыз мамиле жана зордук-зомбулуктун, жол транспортто катталган кырсыктардын жана түрдүү укук бузуулардын, кокустуктардын алдын алуу боюнча тиешелүү мамлекеттик органдар тарабынан жүргүзүлүп жаткан иш-аракеттеринин абалдары жана алдыда аткаруучу милдеттер тууралуу маселелер каралды.

Ал эми ички иштер башкармалыгынын орун басары Маматазиз Хажимуратов кылмыштуулуктун алдын алууда көрүлгөн чаралар тууралуу баяндады.

Анда 2019-жылдын 11 айынын ичинде 731 өспүрүм профилактикалык каттоого алынган. Ал эми быйылкы жылы каттоодон чыгарылган жаш өспүрүмдөрдүн саны 820ны түзсө, ал эми бүгүнкү күндө каттоодо 595 өспүрүм турат. Алардын 453 мектеп окуучулары, 23 кесиптик лицейдин студенттери,10 жогорку окуу жайдын студенттери, 109у эч жерде окубаган балдар болууда.

Жалпысынан кылмыштуулуктун алдын алуу боюнча ар түрдүү темаларда 11211 лекция окулуп, анын 195 массалык маалымат каражаттарында чагылдырылган. Область аймагында спорттук иш-чаралар, семинарлар болуп жалпысынан 10 057 иш-чара жүргүзүлгөндүгүн белгиледи.

Ал эми ыйгарым укуктуу өкүл мектептердеги айрым терс окуяларды эске алуу менен тийиштүү адистерге тапшырма берилип, чара көрүлгөнүн айтып өттү. Анын негизинде район-шаарларда өткөрүлгөн координациялык кеңешмелердин чечимдерин 15-декабрга чейин кабыл аларын билдирди. Область башчысы мектептердеги тартипсиздиктер мугалимдер менен ата-энелердин ортосунда байланыш жок болгондуктан орун алып жатат деп сыпаттады.

Жашы жете электер арасында кылмыштуулук өсүп, кырсыктардын алдын алуу боюнча жетиштүү чара көрүлбөгөндүгү жана түшүндүрүү иштери жетишсиз деп эсептелинип Аксы, Ала-Бука, Токтогул, Сузак райондук администрация башчылары, Таш-Көмүр, Кара-Көл шаарынын мэрлери милдеттендирилди.

Кеңешменин чечиминде жашы жете элек өспүрүмдөр арасында  кылмыштуулуктун, укук бузуулардын, жол транспорт кырсыктарынын, суидциддин алдын алуу багыттарында укук коргоо органдарынын жана район-шаарлардагы билим берүү, эмгек жана социалдык өнүгүү башкармалыктарынын жүргүзүп жаткан иштери жетишсиз деп табылды.

Акылай КАРАБАЕВА, “Аймак”