683 Бардыгы /

«Чет өлкөлүк тыңчылар» жөнүндөгү жаңы мыйзам «Свобода» радиосу жана «Эркин Европа/Азаттык» корпорациясы менен менен кызматташкан Орусиядагы жүздөгөн журналисттерге болгон басымды күчөтөт.

Бул тууралуу RFE/RL президенти Жейми Флай билдирди. Флай мыйзам кабарчылардын ишине каршы багытталганын жана алардын коопсуздугун коркунучка кептей турганын белгилеген.

«Свобода» радиосунун Москвада кеңсеси бар жана жергиликтүү кабарларды чагылдыруу үчүн Орусиянын көптөгөн аймактарындагы журналисттер менен кызматташат. Акыркы жылдары корпорациянын орус кызматы жаңы долбоорлорду ачкан. Алардын арасында «Север.Реалии» жана «Сибирь.Реалии» сайттары да бар. «Реалии» Орусиянын түндүк аймактарындагы жашоо жөнүндөгү материалдарды чагылдырууга арналган. Билдирүүдө «Свобода» радиосу мамлекеттик ЖМКлар көңүл сыртында калтырган маанилүү маселелер жөнүндө кабар берип турары айтылат. Флай жаңы мыйзам көптөгөн журналисттердин оозун басууга жана окурмандардын маалымат алуу укугун чектөөгө багытталганын белгилеген.

2-декабрда Орусиянын президенти Владимир Путин жеке тараптарды «чет өлкөлүк тыңчы» деп таанууга жол ачкан мыйзамга кол койгон.

Ага ылайык, бийлик эми «чет өлкөлүк тыңчылардын» тизмесине киргизилген уюмдарда иштеген журналисттерди «чет элдик агент» деп тааный алат. Ошол эле маалда мындай макам чет элдик ЖМКлар менен кызматташып, алардан акча алган жеке адамдарга дагы бирилиши мүмкүн.

Ноябрда 10 эл аралык уюм, алардын ичинде Amnesty International, Human Rights Watch, «Чек арасыз кабарчылар» жана Журналисттерди коргоо комитети орус бийлигин жарандарды «чет өлкөлүк тыңчы» деп аныктай турган мыйзам долбоорунан баш тартууга чакырган.

«Чет өлкөлүк агенттер жөнүндө» мыйзам Орусияда 2012-жылы кабыл алынган. Аны менен сырттан акча алган бейөкмөт уюмдар атайын реестерде катталууга милдеттендирилген. 2017-жылы ноябрдан тарта чет жактан каржыланган жалпыга маалымдоо каражаттарын дагы бул тизмеге кошууга жол ачкан мыйзам иштей баштаган. Учурда аталган реестрде 150дөн ашык коммерциялык эмес уюм жана маалымат каражаты катталган. Арасында «Эркин Европа/Азаттык» радиосунун орус кызматы жана «Настоящее время» телеканалы бар.

www.