873 Бардыгы /

11-февралда Алматыда 14 жыл мурда өлтүрүлгөн оппозициячыл саясатчы Алтынбек Сарсенбаев эскерилди.

Иш-чаранын жүрүшүндө маркум саясатчынын бир тууганы Рысбек Сарсенбай баяндама жасап, агасынын өлүмү боюнча өлкөнүн мурдагы президенти Нурсултан Назарбаев менен анын улуу кызы, парламент сенатынын спикери Дарига Назарбаева суракка алынышы керектигин билдирди.

— Анын өлүмүнүн сыры дале болсо толук ачыла элек. Буйрутма берген адамдын ысымы айтылган жок. Негизги шектүүлөр көлөкөдө калышты. Назарбаевдин күйөө баласы [Рахат] Алиевди өз убагында жоопкерчиликке тартышкан жок. Агамдын өлүмүнө байланыштуу экс-президент менен анын кызын суракка алууну талап кылам», — деди Сарсенбай.

Ал бул үчүн Казакстанда Назарбаев менен анын үй-бүлө мүчөлөрүнө кол тийбестикти кепилдеген «елбасы» тууралуу мыйзам жоюлушу керек деп эсептейт.

2006-жылы 11-февралда Алматынын четиндеги талаада оппозициялык саясатчы Алтынбек Сарсенбаев менен анын жардамчылары Василий Журавлевдун жана Бауржан Байбосындын сөөктөрү табылган. Бул кандуу окуяга күнөөлүү деп милициянын мурдагы подполковниги Рустам Ибрагимов баштаган тогуз киши соттолгон.

Сурак маалында Ибрагимов саясий буйрутманын «автору» деп Сенаттын аппарат башчысы Ержан Утембаевди атаган. 2006-жылы августта соттун чечими менен айыптуулар узак мөөнөткө кесилишкен. Ибрагимов кылмыштын уюштуруучусу катары өлүм жазасына тартылган. 20 жылга соттолгон Утембаев 2014-жылы иш кайра каралгандан кийин эркиндикке чыгып, 2018-жылы каза болгон.

2013-жылы бийлик Ибрагимовдун көрсөтмөсүнүн негизинде Сарсенбаевди өлтүрүүгө Назарбаевдин мурдагы күйөө баласы Рахат Алиев менен Улуттук коопсуздук комитетинин мурдагы башчысы Альнур Мусаев буйрутма бергенин билдирген. Бирок Алиев менен Мусаев айыптоолорду четке кагып, бул окуяга эч кандай тиешеси жок экенин билдиришкен.

Рахат Алиев өз китебинде Алтынбек Сарсенбаевди өлтүрүүгө буйрутма бергендерди өлкөнүн жогорку жетекчилигинен издөө керектигин жазган. Ал 2015-жылы февралда Австрия түрмөсүндө асынып алган жеринен табылган. Тергөө ал өз жанын кыйган деген бүтүмгө келген. Бирок Алиевдин адвокаттары ал өлтүрүлгөнүн айтып чыгышкан.

www.