806 Бардыгы /

Казакстанда 22-февралда өкмөткө каршы нааразылык акциялар маалында жалпысынан 100дөн ашык адам кармалды.

Алгач түшкө чейин Алматыдагы аянтка Демократиялык партия түзүү демилгесин көтөргөн топтун мүчөлөрү чогулган. Полиция аларды ишембиге караган түнү камакка алынган активист Жанболат Мамайды бошотууну талап кыла баштаганда кармаган. Мамай «уруксат берилбеген митингге катышуу» айыбы менен үч суткага камалган.

Күндүн экинчи жарымында ошол эле аянтта бозгундагы саясатчы Мухтар Аблязов түзгөн «Казакстандын демократиялык тандоосу» кыймылынын митингине катышууга келген 100гө жакын киши кармалды. Алар «Чал, кет!», «Ойгон, Казакстан», «Назарбаев кетсин!», «Дарига кетсин!» деп кыйкырышкан.

Бул күнү Алматы менен Нур-Султанда митингдер өтүп жаткан аянттарда мобилдик интернет өчүрүлүп, журналисттер акцияны түз эфирде көрсөтө алышкан жок.

Ишемби күнү Алматыдан тышкары Нур-Султан шаарында да акцияга чыккан ондогон адам кармалды. Мындан тышкары Чымкентте 20га жакын, Актөбөдө кеминде он адам кармалганы кабарланды.

Казакстанда 22-февралда нааразылык акцияларды өткөрүү планы тууралуу дароо эки оппозициялык топ билдирген. Алардын бири Демократиялык партия түзүү демилгесин көтөргөн топ. Анын башчысы Жанболат Мамай ишембиге караган түнү кармалган. Ал «тынч жыйындарды өткөрүү эрежелерин бузуу» айыбы менен үч суткага камакка алынды.​

22-февралдагы экинчи митингди бозгунда жүргөн мурдагы банкир Мухтар Аблязов менен ал негиздеген «Казакстандын демократиялык тандоосу» кыймылы өткөрүүнү пландаган. Казакстанда бул кыймылдын ишмердүүлүгүнө 2018-жылы тыюу салынган.

Нааразылык акциялардын алдында өлкөнүн Башкы прокуратурасы жарандарга «мыйзамсыз» митингдерге катышуу үчүн жоопкерчилик каралганын эскерткен.

www.