877 Бардыгы /

24-февралда Алматыда чет өлкөдөн автоунаа алган кырктай киши Эгемендүүлүк аянтына чогулуп, машиненин кунунан ашып түшкөн утилизация алымын азайтууну талап кылды. Алар Межлис төрагасы Нурлан Нигматулинге кайрылуу жолдошуп, бул маселени чечүүгө көмөктөшүүнү сурашты.

— Алып келинген машинелердин кунунан көп төлөмдөрдү ким ойлоп тапкан. Аны төлөөгө калктын чамасы жок. Расмий статистика менен айлык акы дал келбейт. Биз өлкөгө 1-февралга чейин кирген автоунааларды мыйзамдаштырып, каттоого бекер алууну талап кылабыз, – деди автоунаа ээси Талгат Тилеубеков.

Буга чейин казак бийлиги бул унааларды 2021-жылдын март айына чейин убактылуу каттоого алууну жана убактылуу номур берүүнү сунуштаган. Чогулгандар буга макул эмес.

Февралдын башында Межлис төрагасы Нурлан Нигматулин чет өлкөлүк каттоодогу автоунаалардын маселесине байланыштуу өкмөттүн ишин сынга алган.

Январда казак бийлиги Армения жана Кыргызстандын номурлары менен жүргөн айдоочуларга кайрылып, бул машинелердин бардык бажы, салык төлөмдөрүн жана утилизация алымдарын төлөө зарылдыгын эскерткен. Каттоодон өтпөй, ишеним кат менен айдап жүргөн унаа ээлерине транспортторун 30 күндүн ичинде Казакстандан чыгаруу же чет өлкөдө сатуу сунушталган.

Казакстандын экологиялык кодексине ылайык, жеңил автоунаалар үчүн утилизациялык алым 900дөн 3 миллион, жүк ташуучу унаалар үчүн 20 миллиондон ашык теңгени (53 миң доллардан ашык) түзөт. Казакстан ИИМинин маалыматына караганда, Армения, Кыргызстан, Беларус жана Орусиядан кирген автоунаалардын саны 170 миңден ашат.

www.