1,558 Бардыгы /

ЭАУнун лицейинин окуучусу менталдык арифметика боюнча жалпы республикалык олимпиадада байгелүү орунга жетишти. Бул тууралуу ЭАУнун Кесиптик багыт берүү жана коомчулук менен байланыштар кызматынан билдиришти.

Менталдык арифметика – оозеки эсеп тутумуна негизделген эсептөөнүн бир түрү, ал эсептөө акыл-эстин кеңири мүмкүнчүлүктөрүнө таянат. Башкача айтканда, математикалык эсептөөлөр компьютерсиз, калькуляторсуз, кагазда эмес, көңүлдө эсептелет. Менталдык арифметиканы өздөштүргөн балдар көз ирмемде ар кандай эсептөөлөрдү оюнда жүргүзө алышат.

Үстүбүздөгү жылдын 23-февралында Ош шаарында менталдык арифметика боюнча жалпы республикалык олимпиада өткөрүлдү, ага Кыргыз Республикасынын аймактарынан 217 мектеп окуучусу катышкан. Алардын катарында К.Ш. Токтомаматов атындагы Эл аралык университеттин (ЭАУ, Жалал-Абад ш.) Эл аралык Кыргыз-Түрк лицейинин башталгыч класстарынын окуучулары да болгон. Курч атаандаштык шарттарында ЭАУнун лицейинин 4-класстагы окуучусу Кадыров Нурсултан 9-10 жаштагылар арасында III орунга жетишти. Эске сала кетели, ушул эле лицейдин окуучусу Садыков Амантур 2018-2019-жылдары менталдык арифметика боюнча республикалык жана эл аралык олимпиадаларда (Казакстан, Алматы ш.) I орундарга жетишкен. ЭАУнун Эл аралык Кыргыз-Түрк лицейинин дирекциясына, окуучуларына республикалык жана эл аралык деңгээлдерде жаңы албан-албан ийгиликтерди каалайбыз! Өзгөчө куттуктоолор жана каалоо-тилектер Кадыров Нурсултанга: Чын жүрөктөн куттуктайбыз, мындан ары да бийик ийгиликтерге жетиш! Өзгөчө белгилеп кетиш керек, Нурсултандын ата-энеси ЭАУнун кызматкерлери: атасы э.и.к., доцент Кадыров Толкунбек Акбаралиевич, апасы э.и.к., доцент Пулатова Гүлнара Тулановна.

“Аймак”