1,107 Бардыгы /

Кыргыз РеспубликасынынПремьер-министри Улукбек Марипов атамекендик бизнес-коомчулук өкүлдөрү менен жолугушту. 

Жолугушуунун негизги максаты катары экономиканы мындан ары карай активдештирүү боюнча демилгелерди жана ишкерлер үчүн жагымдуу шарттарды түзүү боюнча биргелешкен чараларды талкуулоо болуп саналат. 

Жолугушуу эркин микрофон режиминде өтүп, ар бир катышуучу өз идеяларын жана көйгөйлөрүн билдирүүгө ыңгайлуу шарт түзүлдү.

Премьер-министр белгилегендей, мындай форматтагы жолугушуулар Өкмөт жана бизнес-коомчулук ортосундагы пикир алышууга кошумча дем берет жана үзгүлтүксүз негизде өткөрүлүүсү зарыл. 

«Бул жолугушууда катышып жаткандардын ар бири республикабыздын өнүгүүсүнө олуттуу салымын кошкон. Узак убакыт бою биз бизнеске тийиштүү көңүл бура алган жокпуз. Бирок, бул мамилени өзгөртүүгө, мамлекеттик-жеке диалогдун жаңы бизнес-моделдерин ишке киргизүүгө убакыт келип жетти. Биз ишкерлик тармагындагы ачык-айкын эрежелерди камсыздоо үчүн бардык күч-аракетибизди жумшоого даярбыз. Бул ченем жаратуу демилгелерине, ишкерлерге жеке инвестиция тартууга дем берүүгө, инновациялык стартаптарды субсидиялоого, мамлекеттик органдар тарабынан текшерүүлөрдү кыскартуу, укук коргоо жана фискалдык органдар тарабынан бизнеске кысым көрсөтүү фактыларын толугу менен жоюуга тийиштүү», – деди ал жана учурда Өкмөттүн 100 күндүк иш-аракеттер планы иштелип жаткандыгын жана ал бүгүнкү жолугушууда айтылган идеялар менен толукталаарын кошумчалады. 

«Өкмөт аталган планды үстүбүздөгү жылдын 1-июнуна чейин ишке ашырууга умтулууда. Анын негизги бөлүгүндө кагаз жүзүндө кала бербестен, реалдуу жыйынтыгын берүүчү иш-чаралар каралган», – деди Улукбек Марипов.

Премьер-министр белгилегендей, Кыргыз Республикасынын Президенти Садыр Жапаров тарабынан кол коюлган алгачкы жарлыктардын бири «Менчикти коргоо жана ишкерлер менен инвесторлорду колдоо жөнүндө» Жарлыгы болгон, аталган багытта Кыргыз Республикасынын Өкмөтүнө караштуу Экономикалык реформалар боюнча кеңеш да өз ишин алып барууда. 

Өз кезегинде бизнес-коомчулук өкүлдөрү өз көйгөйлөрүн билдиришип, бизнес жүргүзүү үчүн жагымдуу шарттарды түзүү боюнча бир катар сунуштарын киргизишти. 

Жолугушуунун жыйынтыгында Премьер-министр Улукбек Марипов бизнес өкүлдөрүнө конструктивдүү пикир алышуу үчүн ыраазычылык билдирип, 24 саат бою байланышта болууга даяр экендигин билдирди.

“АЙМАК”