1,083 Бардыгы /

БИШКЕК. АКШнын Эл аралык өнүктүрүү агенттиги (USAID) Бишкек, Чүй жана Ош облустарындагы беш ооруканага, ошондой эле үч үй-бүлөлүк медицина борборуна медициналык жабдууларды тапшырды. Кычкылтек концентраторлору, мобилдик рентген аппараттары, тоңдургучтар жана башка жабдуулар орнотулуп, негизги “кызыл зоналардагы” COVID-19 бейтаптарын диагностикалоо жана дарылоо үчүн колдонулуп жатат. Жабдуунун жалпы баасы болжол менен 1,1 миллион АКШ долларын түздү.

Жалпысынан Республикалык жугуштуу оорулар ооруканасы, ССМ Улуттук госпиталы, Бишкек шаардык №1-ооруканасы, Чүй облустук ооруканасы, Ош шаардык клиникалык ооруканасы, Санитардык-эпидемиологиялык көзөмөлдөө департаменти жана үч үй-бүлөлүк медицина борбору дээрлик 500 даана жабдуу жана коштоочу шаймандарды алышты. Алардын арасында ларингоскоптор, мобилдик санарип рентген аппараттары, өтө төмөн температурадагы тоңдургучтар, жогорку көлөмдөгү кычкылтек концентраторлор, автоклавдар, центрифугалар жана башка маанилүү жабдуулар бар.

Улуттук госпиталдын башкы дарыгеринин милдетин аткаруучу Токтобай Маанаевдин айтымында, айрым жабдуулар, медициналык кызматкерлерге жана бейтаптарга биринчи жолу гана жеткиликтүү болуп жаткан чагы: – Биринчи жолу мобилдик рентген сатылып алынып, орнотулду. Ал оорулууну жылдырбай, палатасынан эле өпкөсүн рентген аркылуу текшерүүгө өбөлгө жаратып олтурат. Бул жабдууларды орнотуу үчүн сегиз МедУюм Кыргыз Республикасынын Саламаттыкты сактоо министрлиги жана ооруканалар менен кеңешүү аркылуу, бейтаптардын максималдуу санына жардам көрсөтүү максатында тандалып алынган.

          Баса, медициналык жабдыктарды расмий тапшыруу аземинде USAIDдин Кыргыз Республикасында башчысынын милдетин аткаруучу Кит Симмонс Улуттук госпиталдын дарыгерлерине жана кызматкерлерине талыкпас мээнети үчүн терең ыраазычылыгын билдирди: – Биз Сиздерди колдоп, ушул шаймандарды бергенибизге абдан кубанычтабыз! Бирок, булар Сиздердин чеберчилигиңиздер жана берилгендигиңиздер менен гана жүзөгө ашырылмакчы…

2020-жылдын март айында Кыргыз Республикасында COVID-19 пандемиясы башталгандан бери USAID бул өлкөгө 4 миллион доллардан ашуун колдоо көрсөттү. Бул акча жеке коргонуу каражаттарын сатып алууга жана лобораторияларды жаңыртууга, ошондой эле ден соолукка байланыштуу маалыматтык тутумдарды өркүндөтүүгө жана 4 миңден ашуун медициналык адистерди окутууга жумшалды. USAID ошондой эле COVID-19 жөнүндө мифтерди жана жалган маалыматтарды жоккө чыгаруу үчүн маалымат өнөктүктөрүн дагы абдан кызуу колдоду.

Алишер ТОКСОНБАЕВ, өз кабарчы