942 Бардыгы /

8-декабрда Чымкент шаардык полиция департаментинде сурак учурунда сырдуу жагдайда көз жумган 30 жаштагы Нурболат Жумабаевдин атасы уулунун сөөгүн көрсөттү. Баласынын денеси канталап кеткенин айткан Еркара Жумабаев аны “уруп өлтүрүшкөн болушу мүмкүн” деп шектенүүдө.

– Денесинде соо жери жок. Башы, ийини, буту, араксы. Көгөргөндөн денеси карайып кеткен. Камерага тартууга уруксат беришкен жок. Алар өздөрү тартып турушту. Адвокат ур-токмоктун издери деди. Ал эми тигилер (прокуратура менен полиция кызматкерлери – ред) унчукпай турушат, – деди Ерарка Жумабаев.

Ал 9-декабрда журналисттерге “уулу ооруп көз жумду” деген полициячылардын сөзүнө ишенбей турганын, баласы токмоктон өлгөн болушу мүмкүн экенин кабарлаган.

Жумабаевдин билдиришинче, 8-декабарда түштө баласы Нурболат Жумабаев аны менен видеобайланыш аркылуу сүйлөшүп жаткан маалда кармалган. Болжол менен төрт саат өткөндөн кийин уулунун кайтыш болгону тууралуу кабар келген. Ал баласынын ден соолугу жайында болгонун, жүрөгү оорубаганын айтууда.

8-декабрда маркум менен кошо кармалган экинчи шектүү Сергей Петров чекесинин көгөргөнүн айтты. Ал полициячылар сабаганын кабарлады.

— Башыбызга кап кийгизишип, уруп-согушту. Андан соң шаардык полиция департаментине алып келишти. Жумабаевди да сабашты. Мен баарын көрдүм. Башыбызга күрмө жабышып, колубузду кишендешти. Куртка түшүп калды. Аны (Жумабаевди – ред) кандай алып кетишкенин, кандай уруп-согушканын көрдүм, – деди Сергей Петров.

Чымкент полиция департаменти бул боюнча комментарий бербей, экспертизанын жыйынтыгын күтүүнү сунуштады.

WWW.