1,628 Бардыгы /

ОШ. Президенти Сооронбай Жээнбеков Ош шаарында келечекте беш миңдей адамды иш менен камсыздоочу жана  электробустарды чыгара турган  «Кыргыз Унаа Курулуш» заводуна дагы баш бакты.

Ушул таптакурулуш иштеринин биринчи этабы аяктап, завод өз ишин дээрлик баштады. Аталган ишкана ишке кириши менен 500гө чейин азырынча жумуш орундары түзүлдү. Ал эми курулуш иштеринин экинчи этабы бүткөрүлүп, завод толук ишке киришкенде, жумуш орундарынын саны дагы миңге жетет. Заводдо жеңил жана оор өнөр жай, айыл чарба тармагы үчүн комплекттөөчү  шаймандар менен техникалар өндүрүлүп жатат. Буга улай трансформаторлор менен акылдуу эсептегичтер дагы иштелип чыгып, текшерүүдөн өтүүдө. Ошондой эле Кыргызстандан чыгарыла турган биринчи электробустун прототиби дагы даярдалууда. Ата мекендик электроэнергетикалык тармагынын чоң потенциалын эске алуу менен ошондой эле чакан жана чоң гидроэлектрстанциялар үчүн зарыл болгон жабдуулар, анын ичинде гидротурбиналар менен генераторлор дагы чыгарылууда. Курулуш иштеринин биринчи этабына болжол менен 20 миллион АКШ доллары сарпталган. Завод Европа жана Жапониянын заманбап жабдуулары менен жабдылган.

Президент Сооронбай Жээнбеков эмгек жамааты менен болгон баарлашуусунда ишкананын ишмердүүлүк масштабына купулу толгондугун ачык эле билдирип, өлкөдө мындай завод биринчи жолу курулуп жаткандыгын дагы баса белгиледи. Мамлекет башчысы 2001-жылы Жапонияга окуу программасынын алкагында «Тошиба» компаниясынын заводунда болгонун эскерип,  Жапон корпорациясынын ишмердүүлүгү менен корпоративдик этиканын принциптери жөнүндө айтып берди. 

– «Тошибанын» ар бир кызматкери иштеген ишканасына өзүнүн жеке менчигиндей мамиле кылып, анын өнүгүшүнө кызыкдар экен. Өздөрүнүн билими менен күчүн арнап, алардын жетиштүү жашоосуна таасир этерин аңдап, компаниянын гүлдөп-өсүшү үчүн ак ниеттүүлүк менен иштешет, — деп өзгөчө белгиледи Президент Сооронбай Жээнбеков.  – «Кыргыз Унаа Курулуштун» кызматкерлерине дагы ушундай жаратмандыкты кааламакчымын. Болочокто булл завод өлкөдө эле эмес, аймакта дагы адыңкы позицияны ээлерине бекем ишенем!

Мамлекет башчысы соңунда корпоративдик биримдикке чакырып, ишкананын ийгиликтүү ишмердиги ар бир жумушчунун жана жалпы эле эмгек жамаатынын аракетинен көз каранды экендигин дагы баса белгиледи.  Президент Сооронбай Жээнбеков  аймактарды өнүктүрүүнүн мамлекеттик саясатынын алкагында жер-жерлердеги ишкерлердин демилгелерин  колдоого өзгөчө көңүл бурулаарын кошумчалады.  Өлкөнүн каржы институттарынын каражаттарынын көп бөлүгү негизинен аймактардагы ишкердикти колдоого багытталган.

Алишер ТОКСОНБАЕВ, өз кабарчы