1,698 Бардыгы /

ОШ. Ош облусу боюнча бош орундардын саны 177 эле.  Ошондуктан, мамлекеттик жана муниципалдык жалпы билим берүү уюмдарынын жетекчилигине сынактын экинчи айлампасында 108 талапкер босого баллдан өттү. Бул жөнүндө Билим берүүнүн сапатын баалоо жана маалымат технологиялары улуттук борборунан маалымдашты.

Ошентип, тестирлөөгө 310 талапкер катышып, булардын арасынан 108 талапкер 60 пайыздан жогору көрсөткүч менен босого баллды багындырышты. Сынакка катышуу максатында Ош облусу боюнча жалпы жонунан 408 талапкер документ тапшырып, ат салышты. Эксперттик комиссиянын чечимине ылайык 332 талапкер тестке катышууга чакырылды. 22 талапкер сынакка келген эмес. Ал эми 76 талапкердин документтери талапка жооп бербегендиги ашкереленди. Аталган борбордон Ош облусу боюнча ваканттык орундардын саны 177 экендигин кошумчалашты.

Белгилей кетчү жагдай: чек арадагы кагылышуунун кесепетинен Баткен, Ош жана Жалал-Абад облустарындагы мектеп директорлорун дайындоо сынагы белгисиз мөөнөткө жылдырылган эле. Ушул тапта Бишкек менен Ош шаарларында экинчи айлампага документтерди кабыл алуу башталды.

Алишер ТОКСОНБАЕВ, өз кабарчы