708 Бардыгы /

Биргелешкен стратегиялык координациялык комитет 2023-2024-жылдарга иш пландарын жактырды. Бул тууралуу Министрлер кабинетинин басма сөз кызматы билдирди.

Быйылкы 24-мартында 2023-2027-жылдарга Туруктуу өнүктүрүү боюнча кызматташтыктын жаңы алкактык программасы (Кызматташтык программасы) боюнча Кыргыз Республикасынын Министрлер Кабинети менен Кыргыз Республикасындагы Бириккен Улуттар Уюмунун Биргелешкен стратегиялык координациялык комитетинин жыйыны өттү. Жолугушуунун жыйынтыгында 2023-2024-жылдарга биргелешкен иш пландары бекитилди. Жыйынга Министрлер Кабинетинин Төрагасы Акылбек Жапаровдун жана БУУнун Туруктуу координатору Антье Граве тең төрагалыгында өттү.

Ачылыш сөзүндө Министрлер кабинетинин төрагасы Акылбек Жапаров БУУнун тутумуна көрсөткөн колдоосу үчүн ыраазычылык билдирип, ар тараптуу кызматташууну мындан да бекемдөөгө ниетин билдирди. Жүргүзүлүп жаткан реформалардын шартында адамдардын турмушун жакшыртуу жана өнүгүү үчүн жакшы шарттарды түзүү боюнча биргелешкен иш пландарынын актуалдуулугун баса белгиледи.

 «Биз жаңы беш жылдык Кызматташтык программабыздын алкагында Кыргызстан менен дагы да инклюзивдүү жана ар тараптуу өнөктөштүктүн жаңы дооруна кадам таштоодобуз. Кызматташтык программасы – улуттук өнүгүү приоритеттерине жана 2030-жылга карата Күн тартибине шайкеш келген туруктуу жана адилеттүү өнүгүүгө багытталган биздин негизги куралыбыз. Биргелешкен иш пландар аркылуу биз эң аялуу катмарга биринчи колдоо көрсөтүп, эч кимди артта калтырбай, адамдардын жана планетанын кызыкчылыгында өнүгүүнүн татаал маселелерин чечүүнү көздөйбүз. Өкмөт, парламент, жарандык коом, жеке сектор, жаштар, академиялык чөйрө жана башкалар менен бирге Кыргызстанды өнүктүрүүнүн амбициялуу максаттарына жетүү үчүн колдоо көрсөтүү менен бирге, биз 2030-жылга карата Туруктуу өнүгүү максаттарына ыкчам жетүүнүн керектигин баса белгилейбиз», – деди БУУнун Туруктуу координатору Антье Граве.

 Антье Граве кызматташтык программасы БУУнун Кыргызстан менен төрт приоритеттүү багыт боюнча кызматташуусунун негизин түзөрүн баса белгиледи. Алар:

Сапаттуу социалдык кызмат көрсөтүү;

Жашыл социалдык-экономикалык өнүгүү;

Климаттык аракеттер жана кырсык тобокелдиктерин алдын алуу; жана

Башкаруу, адам укуктары жана гендердик теңдик, коомдук биримдик жана тынчтык.

2023-жылдын январь жана февраль айларында биргелешкен иш пландары тиешелүү мамлекеттик институттардын, жарандык коомдун, эмгек уюмдарынын, жеке сектордун жана башка өнөктөштөрдүн өкүлдөрү менен улуттук консультацияларда талкууланган.

Кыргызстандын Өкмөтү менен БУУнун Биргелешкен стратегиялык башкаруу комитети Бириккен Улуттар Уюмунун Туруктуу өнүгүү боюнча Кызматташтык алкактык программасынын жогорку башкаруучу органы болуп саналат.