546 Бардыгы /

Кыргыз Республикасынын УКМКсына караштуу Мамлекеттик  Чек ара кызматынын маалымат жана коммуникация башкармалыгынын маалыматына караганда, Бишкек шаарындагы Советтер Союзунун Баатыры Дайыр Асанов атындагы сейил багында Чек ара даңкы аллеясында “Күжүрмөн эсеп” мекенчилдик акциясы өткөрүлдү.

Күжүрмөн эсеп – бул мамлекеттик чек араны кайтарууга чек арачыларды дайындоонун салттуу ырым-жырымы. Күн сайын республиканын бардык чек ара заставаларында жана өткөрүү жайларында “Кыргыз Республикасынын мамлекеттик чек арасын кайтарууга чыгууга буйрук кылам!” деген буйрук берилет. Аталган жөрөлгө катарда турган жигиттер жөн эле жоокер эмес, 1941-жылы жана жакында эле – 2021-жылдын апрелинде жана 2022-жылдын сентябрында болгон окуялардагыдай, өз Мекенинин чек арасын кайтарып, душманга биринчилерден болуп сокку урган жоокерлер экендигин туюндурат. “Күжүрмөн эсеп” эскерүү иш-чарасын Кыргыз Республикасынын УКМКсына караштуу Мамлекеттик Чек ара кызматынын Ардагерлер Кеңеши өткөрдү.

2016-жылы башталган бул иш-чара Аскердик антына бек турган мурда жашыл фуражка кийгендердин жана азыр кийип жүргөндөрдүн баарын бириктирген жакшы салттуу жөрөлгөсүнө  айланды. “Күжүрмөн эсеп”  иш-чарасы Кыргызстандын чек арачыларынын, Чек ара кызматынын ардагерлеринин жана өлкөнүн конокторунун салттуу жолугушуусу болуп саналат. Чек арада кызмат өтө жооптуу жана ардактуу. Бул вазийпа эң мыктыларга гана – Кыргызстандын эркиндигин жана көз карандысыздыгын коргоо үчүн күчүн, керек болсо жанын да аябагандарга гана ишенип тапшырылат.

• Өлкөбүздүн тынчтыгы, бейпилдиги үчүн жанын аябаган чек

арачыларыбыздын эрдигине, баатырдыгына далай жолу күбө болдук. 1941-жылы фашисттик аскерлердин соккусун биринчи болуп чек арачылар тосушкан. Алардын эрдиги жана тайманбастыгы «Жашыл фуражкачандардын» бир нече муунун шыктандырып гана келатат. Буга мисал сыёары Кыргызстандын Түштүк чек араларында жакында болгон окуяларда биздин чек арачылардын душмандын мизин аеосуз кайтаруусу мисал боло алат. Биздин куралдаштарыбыздын төгүлгөн каны жер жүзүндөгү тынчтык үчүн өтө чоң баа экенин эстен чыгарбашыбыз керек. Андыктан биз, ардагерлер, чек ара кызматынын кадыр-баркын көтөрүүгө, жаштарыбызды Мекенди сүйүүгө, мекенчилдик сезимдерин тарбиялоого аракет кылып келебиз, – деп баса белгиледи Кыргыз Республикасынын УКМКсына караштуу Мамлекеттик Чек ара кызматынын Ардагерлер Кеңешинин төрагасы, запастагы полковник Чолпонбек Буржуев.

Баса, чек арачы-ардагерлердин катышуусундагы “Күжүрмөн эсеп” акциясы өлкөбүздүн бардык облустук борборлорунда өткөрүлдү.

Алишер ТОСКОНБАЕВ, өз кабарчы