15 Бардыгы /

Баткен облусунун Кызыл-Кыя шаарында мурда мыйзамсыз менчиктештирилип кеткен жалпы аянты 3,61 гектар жер тилкеси, жалпы сметалык баасы 681 миллион сомдон ашык имараттары менен кошо акыры мамлекетке кайтарылды.

Баса, Улуттук коопсуздук мамлекеттик комитети мыйзамсыз менчиктештирилген жер тилкелерин аныктоо жана мамлекеттин балансына кайтаруу боюнча иштерди дагыле улантууда. Тактап айтканда, «Кылмыштардын бириктүү реестри» автоматташтырылган маалыматтык тутумунун электрондук маалыматтык журналына катталган тергөө материалдарынын алкагында Кызыл-Кыя шаарынын муниципалдык менчик балансына болжолдуу наркы 681 миллион сомдон ашкан курулуштары менен 36 106 чарчы метр (3,61 га) аянттагы мурда мыйзамсыз менчиктештирилген жер тилкеси акыры мамлекетке кайтарылды. Мындан тышкары тиешелүү иштердин алкагында Кызыл-Кыя шаарынын аймагында аянты 3,5 гектар жер тилкеси белгиленген салыкты төлөөдөн качуу максатында укукту күбөлөндүрүүчү документти алууда чектеш аймактарга ээлик кылган жеке адам тарабынан мамлекеттик актыга киргизилген эмес. Андыктан баасы 280 миллион сомду чапчыган  жогорудагы жер тилкеси дагы Кызыл-Кыя шаарынын мэриясынын балансына кайтарылды.

УКМК мындан ары дагы мониторингди ырааттуу улантып, мыйзам бузуу менен менчиктештирилген обьекттердин баарын тең мамлекеттин балансына кайтарып берүүнү дагы улантат.

Алишер ТОКСОНБАЕВ, өз кабарчы