30 Бардыгы /

Жакынкы жайыттарды колдонууга күзгө чейин атайын чектөө киргизилди. Мындайча айтканда, Суу ресурстары, айыл чарба жана кайра иштетүү өнөр жайы министрлиги жакынкы жайыттарга мал жаюуга ушул жылдын 15-апрелинен тартып 15-сентябрына дейре чектөө кире тургандыгын акыры шардана кылды.

Аталган министрликтин басма сөз кызматы тараткан маалыматка караганда, мындан ары мал ээлери бул аралыкта алыскы жайыттарды гана пайдаланууга тийиш. Жайыт жерлеринин деградациясын азайтуу, жакынкы жайыттарды жакшыртуу жана алардын азыктуулугун жогорулатуу максатында Суу ресурстары, айыл чарба жана кайра иштетүү өнөр жайы министрлигинин 2024-жылдын 23-июлунда №04-13/152 буйругу чыгып, жыл сайын 15-апрелден 15-сентябрга чейинки мезгилде жазгы жайыт жерлерине мал жаюуга чектөө киргизүү сунуш этилди. Бул чектөөнү орой бузгандарга Укук бузуулар кодексине ылайык атайын айыпка тартуу чаралары дагы кошо каралган. Ушул тапта Суу ресурстары, айыл чарба жана кайра иштетүү өнөр жайы министрлигинин эсебинде жайыттарды натуура колдонуунун айынан Кыргызстанда 139 069 га жакын жайыт деградацияга учурап олтурат.

Кыргызстанда жалпысынан 9 миллион 34 миң гектар жайыт бар. А мунун арасынан 70 чакты пайызы жарандарга пайдаланууга берилген. Соңку беш жылда мал кескин түрдө көбөйгөндүктөн, кен байлык казуудан жана климаттын өзгөрүүсүнөн улам жайыттардын аянты дээрлик 25 миң гектарга кыскарып олтурат. Кыргыз Республикасынын Министрлер кабинети былтыр 2024-2029-жылдарга карата Кыргызстандын жайыттарын өнүктүрүү программасын бекиткен. Өкмөт ушул тапта өлкөдө жайыт аянтынын үчтөн бир бөлүгүн уулуу, зыяндуу жана мал жебей таптакыр жебей турган өсүмдүктөр (отоо чөптөр) басып кеткендигин билдирип аткан маалы. Мунун ичинде тикенектүү алтыгана бадалы дагы бар.

Алишер ТОКСОНБАЕВ, өз кабарчы