3 Бардыгы /

Бүгүн, 18-апрелде, КР Министрлер Кабинетинин төрагасынын орун басары – УКМК төрагасы Камчыбек Ташиев Баткен облусунун тургундары менен жолугушту.

Жолугушуу кыргыз-тажик чек арасынын делимитациясына байланыштуу болуп, ага облустун бардык райондорунан тургундар чакырылды.

Камчыбек Ташиев кыргыз-тажик чек арасынын чечилиш таржымалын, Совет доорунан бери карай кандай жагдайлар орун алганы тууралуу учкай токтолду. Негизги маселе, учурда чечимин тапкан чек ара маселеси боюнча болуп, Камчыбек Ташиев кыргыз-тажик тараптар кайсыл жер аянттарын кандай шартта алмашууга барганы тууралуу деталдуу маалымат берди. Жергиликтүүлөрдү кызыктырган суроолорго да так жооптор узатылды.

Көчүрүлүшү керек болгон Достук айылынын тургундарына мамлекет тарабынан жаңы заманбап үйлөр курулуп берилээри дагы бир ирет белгиленди.

Камчыбек Ташиев эми негизги басымды кыргыз-тажик чек арасынын демаркациялоого жасаарын айтып, зым тартуу иштери үчүн чек ара кызматынын аймакта өздүк курамы, тийиштүү кызматкерлер, жетекчилери менен кошо күчөтүлгөн режимде иш алып бараарын белгиледи. Зым тартуу иштерин ушул жылдын аягына чейин бүтүрүү тапшырмасын өлкө башчысы Садыр Жапаров Камчыбек Ташиевге милдеттендиргенин айтып, бул тапшырманы аягына чыгаруу үчүн, эгер зарылчылык болсо, Баткенге көчүп келип, жумуштун темпин жеке көзөмөлүнө алаарын эскертти.

Чогулган эл тарабынан өлкө жетекчилигине ыраазычылык айтылып, аксакалдар ак батасын беришти. Мындан ары, Баткенде жакшылык саамалыктары гана орун алышын, тынчтык жана ынтымак өкүм сүрүшүн тилешти. Өткөндөргө Куран окулду.

Баткен жаштарынын атынан Камчыбек Ташиевге “сувенирдик балта” белек кылышты жана “…мындан ары дагы коррупционерлер жана элдин тынчтыгына, ынтымагына, өлкөнүн өнүгүшүнө каршы болуп жаткандардын тамырын чабууну күчөтүүнү…” улантуусу зарылдыгын айтышты.

WWW.