3 Бардыгы /

Бүгүн,21-октябрда Манас шаарындагы административдик имаратта Кыргыз Республикасынын көрүнүктүү мамлекеттик жана коомдук ишмери Жаңыл Түмөнбаеванын 80 жылдык мааракесине арналган салтанаттуу иш-чара болуп өттү.

Иш-чарага Жаңыл Түмөнбаева, Кыргыз Республикасынын Президентинин Жалал-Абад облусундагы ыйгарым укуктуу өкүлүнүн биринчи орун басары Нурлан Эрматов, орун басар Урмат Самаев, Манас шаарынын мэри Эрнисбек Ормоков, “Бекмамат Осмонов” атындагы Жалал-Абад мамлекеттик университетинин профессордук-окутуучулук курамы, студенттер жана коомчулук өкүлдөрү катышты.

Салтанатта Нурлан Эрматов Жаңыл Түмөнбаеваны 80 жаш кутман курагы менен куттуктап, анын мамлекеттин, анын ичинде Жалал-Абад облусунун өнүгүүсүнө кошкон зор салымын белгиледи.

“Жаңыл Түмөнбаевна – терең билими жана бай тажрыйбасы менен мамлекетибиздин өнүгүүсүнө чоң салым кошкон инсандардын бири. Сиздин эмгегиңиз жана коомдогу лидерлик сапаттарыңыз келечек муундар үчүн чыныгы үлгү болуп саналат. Сизге бекем ден соолук, узун өмүр жана бактылуу каарылык каалайм”, – деп белгиледи өкүлдүн биринчи орун басары өз сөзүндө.

Жаңыл Түмөнбаева Кыргыз ССРинин Министрлер Советинин төрагасынын орун басары, Кыргыз Республикасынын өнөр жай жана тышкы соода министринин орун басары, Ала-Бука районунан Кыргыз ССРинин Жогорку Советинин депутаты, ошондой эле Дүйнөлүк Банктын “Соодада жана ишкерлик-техникалык тоскоолдуктарды кыскартуу” долбоорунун директору болуп эмгектенген.

Мындан тышкары, ал 1998-2002-жылдары Жалал-Абад облустук мамлекеттик администрациясынын башчысынын (губернатордун) биринчи орун басары катары облустун өнүгүүсүнө, экономикалык жана социалдык программаларды ишке ашырууга активдүү катышкан.

Жаңыл Түмөнбаеванын көп жылдык эмгеги жогорку мамлекеттик жана эл аралык сыйлыктар менен бааланган. Ал “Манас” орденинин, “Даңк” медалынын ээси болуп, бир катар эл аралык сыйлыктар жана ардактуу профессордук наамдар менен сыйланган.

Иш-чаранын жүрүшүндө Жаңыл Түмөнбаеванын өлкөнүн жана облустун өнүгүүсүнө кошкон зор салымын жогору баалоо максатында ага “Жалал-Абад облусунун Ардактуу атуулу” наамы тапшырылды.