12 Бардыгы /

Жалал–Абад облусуна Кытай Эл Республикасынын Кызыл–Суу Кыргыз автоном облусунун делегациясы иш сапары менен келди.

Иш сапардын негизги максаты – “Бекмамат Осмонов” атындагы Жалал-Абад мамлекеттик университети менен илимий-билим берүү жаатындагы кызматташтыкты тереңдетүү болуп саналат.

Делегацияны Кызыл-Суу Кыргыз автоном облусунун вице-губернатору Вэнь Гуанхуа жетектеп келди. Делегация менен Кыргыз Республикасынын Президентинин Жалал-Абад облусундагы ыйгарым укуктуу өкүлүнүн биринчи орун басары Уларбек Исмаилов жолугушту.

Жолугушуунун жүрүшүндө Жалал-Абад мамлекеттик университети менен Кытайдын бир катар илимий мекемелеринин ортосунда стратегиялык кызматташтык боюнча төрт тараптуу келишимге кол коюлду.

Келишим илимий-техникалык кызматташтыкты өнүктүрүүгө, айыл чарба тармагында биргелешкен изилдөөлөрдү жүргүзүүгө, инновациялык технологияларды иштеп чыгууга жана Кытай–Кыргызстан–Өзбекстан темир жол долбоорунун мүмкүнчүлүктөрүн натыйжалуу пайдаланууга багытталган. Ошондой эле документте биргелешкен лабораторияларды түзүү, жогорку квалификациялуу адистерди даярдоо жана тажрыйба алмашуу боюнча бир катар маанилүү багыттар каралган.

Иш сапардын алкагында тараптар эки аймактын илимий жана экономикалык потенциалын талкуулап, келечектеги биргелешкен долбоорлор боюнча пикир алышты.