885 Бардыгы /

БИШКЕК. Жогорку Кеңеш депутаты Жанар Акаев бийликти күч менен басып алууга аракет кылып жатат деп айтылган кептер боюнча мекендештерине атайын Кайрылуу жасады.

Эл өкүлү акыркы кезде ал жөнүндө жалаң гана жалган маалымат таратылып жаткандыгын баса белгилеп,  бир дагы саясатчы менен бийликти басып алуу туурасында эч бир жерде сүйлөшпөгөндүгүн шардана кылды. Ал эми генерал Курсан Асанов менен акыркы жолу ушул жылдын февраль айында куран окутуу жайында жолуккандыгын, ошол бойдон анын менен телефон аркылуу эч сүйлөшпөгөндүгүн кошумчалады.

• “Алмазбек Атамбаев, Курсан Асанов, Жанарбек Акаев бийликти

басып алуу аракетин көрүп жатат” дешкени таптакыр акылга сыйбайт. Бул курулай доомат! Эмне өзүм бийликтин бир бутагында олтурсам, эмне үчүн аны басып алышым керек? Өзүмдүн кеңсемди басып аламбы? Бир саясатчынын сөзү үчүн эле айыпка жыгабыз дешсе, азыркы бийлик куп жаңылат. Андай жол менен кеткендердин аягы эзели жакшы бүткөн эмес! Оюбуз, же сын пикирибиз болсо пресса жана парламент аркылуу айтабыз. Андыктан, бул сапар бизди түрмө менен коркутушканы эч өтпөйт. Анткени кара пиар, жалган маалыматтын өмүрү кыска болоорун жакынкы тарых далилдеп келе жатпайбы, — деди Жогорку Кеңеш депутаты Жанар Акаев.

Парламентарий ошондой эле муну шайлоонун алдындагы кадимки аракет сыңары көрүп, парламентке жалаң кошоматчыларды алып келүү ниети болсо, бул дагы терең жаңылыштык экендигин кошумчалады.

• Бизди “Камап коёбуз! Айып тагабыз!” дегенине эч качан

ишенбегиле? Биздин ниетибиз ак, оюбуз таза, багытыбыз дагы түз. Дагы бир жолу кайталап коеюн, эч качан бийликти басып алуу аракети болгон эмес. Ошондуктан, бизди опузалап, апаптап коёбуз деген арам тиектери дегеле жүзөгө ашпайт. Мындай окуялардан биз бир гана курчуйбуз, бирок, эч качан мокобойбуз! Эркин, адилеттүү жана кубаттуу Кыргызстанды куруу аракетибизден артка кайтпайбыз! — деп агынан жарылды парламентарий Жанарбек Акаев.

Сөзүнүн соңунда эл өкүлү дагы бир ирет анын аты аталып таратылып жаткан жалган видеолорго таптакыр ишенбөөгө мекендештерин чакырды.

Алишер ТОКСОНБАЕВ, өз кабарчы