402 Бардыгы /

ЖАЛАЛ-АБАД. Базар-Коргон районунун Сайды-Кум айыл өкмөтүнө караштуу алты айылда быйыл апрель айынан тартып да тазалык иштери жолго коюлууда.

Бул жетишкендик кандайча жолго коюлуп калгандыгы тууралуу Сайды-Кум айыл өкмөт башчысы Майрамбек Абдырасулов мындайча баяндап берди.

“Айыл жерлеринде таштандылардын көлөмү ушунчалык көбөйүп, эл арасында чоң көйгөй жаралып, анын айынан учур-учуру менен уруш жаңжалдар да жүз бере баштаган. Ушундан улам биз айыл өкмөттүн аткаруу бийлиги, айылдык кеңештин депутаттары менен бирдикте атайын кеңешме өткөрдүк. Көйгөй жараткан абалдан чыгуунун ар кандай жолдорун издедик. Жыйынтыгында буга чейин айыл калкына ар тараптуу социалдык колдоо көрсөтүп келе жаткан эл аралык уюмдарга 2022- жылдын август айларында кайрылуу жолдодук. Кайрылуубуз абдан натыйжалуу болуп, эки тараптуу даярдалган долбоор бир жылга жетип, жетпеген убакытта эл аралык “Био.kg” коомдук уюмy жана “Абад” коомдук фондусу менен бирдикте, көптөн бери көйгөй жаратып келе жаткан тазалык маселесин чечтик”, -деп билдирди айыл өкмөт башчысы М.Абдырасулов.

Азыр аты аталган коомдук фонддордун долбоорлорду ишке ашыруудагы жардамы менен бир МТЗ.82 трактору, чиркегичине өзү жүктөөчү шаймандары менен Сайды-Кумдун айыл аймактарында тазалык маселесин чечүү максатында кызуу иш алып барылууда.

Долбоор “Абад” коомдук фондусу жана “Био.KG” коомдук уюму аркылуу “Жергиликтүү экономиканы биргеликте пландаштыруу жана өнүктүрүү” долбоорунун алкагында аткарылып, аталган долбоор (GIZ) Германия эл аралык кызматташтык коомунун “Аймактарды комплекстүү өнүктүрүү” программасынын негизинде, Европа Биримдиги жана Германиянын Экономикалык кызматташтык жана өнүктүрүү федералдык министрлигинин каржылоосу менен ишке ашырылды.

Узакбай МАМАТКУЛОВ, журналист, Базар-Коргон району