1,712 Бардыгы /

Жалал-Абад шаарында кургак учукка каршы бир айлык акция жарыяланып, ал жыйынтыкталуу алдында турат. Бирок эң негизги көйгөй мурдагыдай эле көңүл сыртында калууда. Шаар аймагында жападан жалгыз флюорографиялык аппарат да эскирип, иштебей калуу коркунучунда турат. Ал гана эмес имаратынын да эскилиги жетип, жаракалар кеткен, урап түшүп калуу коркунучу бар экенин тийиштүү кызматтар эскертип келгени менен жалгыз лаборатория үчүн башка жай жокпу айтор азырынча аталган маселеге баш катырган эч ким жок.

“Эң көп дегенде күнүнө 50 гана адамды кабыл алууга болот. бирок кээде 60 ка жетет. Анткени шаар аймагындагы бардык мекеме-ишканалар, мектептер бизге келишет. 1991-жылдан бери иштеген флюорографиялык аппарат тез-тез бузулуп, түмөн түйшүктү жаратат. Иштөөгө шарт жок” – дейт             флюорография лаборанты, Элмира Нурсейитова.

Башка медициналык жеке менчик  мекемелерде мындай аппараттар иштейт. Алар текшерүү иштерин көрсөтө алганы менен кызмат көрсөтүү акысы бир топ кымбат. Ошондуктан карапайым элдин капчыгына туура келбесин айтат шаар тургуну Үржан Мырзатаева.

Ал эми каттоочу медайым Гүлсара Пайзуллаеванын билдиришинче, бейтаптар үчүн өтө керек болгон жалгыз лабораториянын көйгөйү муну менен эле бүтүп калбайт. Имараттын эскилиги жетип, дубалдарындагы жаракалар көбөйүүдө. Тийиштүү органдар жараксыз деп таап, кайра-кайра эскертүү бергенине карабай ишин улантып келет.

Жалал-Абад шаарында 24-февралдан тарта 24-мартка чейин Кургак учукка каршы күрөшүү айлыгы жарыяланган. Ар кандай иш-чаралар белгиленип, акциялар уюштуруу пландалган. Бирок, лабораторияда элементардык шарт жана аппаратура болбосо, андан эмне пайда?

Аталган маселе боюнча жергиликтүү бийлик өкүлү, Жалал-Абад шаар мэриясынын социалдык иштер боюнча вице-мэри Руслан Алтымышовго кайрылганыбызда, ал саламаттык сактоо министрлигине кайрылгандыктарын билдирди.

“Учурда шаардагы саламаттык сактоо мекемелерин текшерип чыгып, керектүү медициналык аппараттарды белгилеп жаздык. Аларды КР нын Саламаттык сактоо министрлигине кайрылуу катын жазабыз”. дейт Алтымышов.

Жолдонгон бул кат менен 28 жылдык флюорографиялык аппаратты жаңысына алмаштыруу маселеси кыйынга турчудай, анткени жаңы аппараттын баасы миллион сомдон ашуун. Бирок жергиликтүү бийлик жок дегенде жараксыз имараттан жаңысына көчүрүү көйгөйүн чечип беришсе болмок.

Роза АКМАТЖАН КЫЗЫ  “Аймак”