2,739 Бардыгы /

Бүгүн, 30-декабрь күнү Жалал-Абаддагы Өкмөттүн ыйгарым укуктуу өкүлү Кыянбек Сатыбалдиев спортчулар менен жолугушту.

Өкүл спортчуларга жакшы каалоо-тилектерин айтып, алдыда дагы ийгиликтерди багындыруусун, өлкө үчүн чоң салым кошуусун, мамлекеттин желегин дагы да желбирете беришин каалап өттү.

1-орунду багынткан спортчуларга 15 миң, 2-орунга 10 миң, 3-орунду ээлеген 27 спортчу акчалай сыйлыктарын тапшырды. Ага 260 миң жалпы каражат бөлүнгөн.

Андан сырткары 20-24-декабрда Нурсултан шаарында өткөн эркектер жана аялдар арасында “Алыш” күрөшү боюнча өткөн XVII чемпионатта Элдияр Сексенбаев биринчи орунду багындырган.

“Жалпысынан 4 балбан менен күрөштүм. Анын экөөсү абдан күчтүү дүйнө чемпиондору эле. Жарым финалда Россиянын балбаны  менен ал эми финалда Ирандын балбаны менен күрөштүм. Кыргызстандын гимнин ойнотуп, желегин желбиретип өзгөчө сезимдер болду. Жеке машыктыруучум Нурбек, Чыңгыз Акановдор болуп саналат. Учурда өкүлдүн жыл жыйынтыгы менен сыйлыгын алып жатабыз. Бардыгына ыраазычылык билдирем”,-дейт Э.Сексенбаев.

Аталган чемпионатта 27 өлкөдөн келген 275 спортчу катышкан. Кыргыз Республикасынын курама командасы  5 алтын, 1 коло медалга жана жалпы команда боюнча да 1-орунду ээлеген.

Акылай КАРАБАЕВА, “Аймак”