1,293 Бардыгы /

Тажикстан парламентинин төмөнкү палатасы ата мекендик авиакомпанияларды күйүүчү май, техника жана жабдууларды алып кирүүдөгү кошумча нарк салыгынан бошотуу тууралуу мыйзам долбоорун жактырды.

Документке ылайык, салык жеңилдиктери “Тажик Эйр” жана “Сомон Эйр” авиакомпанияларына 2027-жылга чейин берилет. Бул аралыкта сырттан күйүүчү-майлоочу материалдарды, учактарды, тик учактарды жана авиакыймылдаткычтарды алып келүүдө алардан кошумча нарк салыгы алынбайт. Бийлик мындай чаранын максаты – авиация тармагын өнүктүрүү жана бул сферадагы кызмат көрсөтүүлөрдүн сапатын жогорулатуу экенин билдирүүдө.

Талкуунун жүрүшүндө айрым депутаттар өлкөнүн авиация тармагындагы көйгөйлөргө токтолуп, бийлик авиакомпанияларга Батыш Европа жана Тынч океан аймагына жаңы каттамдарды ачуу, ошондой эле бул тармактагы маселелерди чечүү үчүн колдоо көрсөтүшү керек экенин белгилешти.

“Тажик Эйр” улуттук авиакомпаниясы бир нече жылдан бери кризисте. 2015-жылы тажик өкмөтү компаниянын 370 миң долларлык карызын кечсе, 2020-жылы анын насыя берүүчүлөрү менен өз ара эсептешүү аркылуу 2 миллион долларынан кутулткан. 2019-жылы өкмөт компаниянын салык органдарына жана мамлекеттик ишканаларга болгон 2,6 миллион доллар карызын кечкен.

Былтыр “Озоди” радиосу жарыялаган иликтөөдө “Тажик Эйр” толук банкрот болуунун алдында экени белгиленип, анын салык органдарына, банктарга, аэропортторго жана башка техникалык кызматтарга 40 миллион долларлык карызы бар экени айтылган.

Айрым маалыматтарда Тажикстандын президенти Эмомали Рахмондун жакын туугандарына таандык экени айтылып жүргөн “Сомон Эйр” авиакомпаниясы 2008-жылы түзүлүп, бүгүнкү күндө бул тармакта монополист болуп эсептелет.

WWW.