1,140 Бардыгы /

ЖАЛАЛ-АБАД. Милиция: “Жылаңач түшкөн сүрөттөрүңү интернетке таратам” деп шантаж кылып, опузалагандар кармалды.

Жалал-Абад ОИИБдин басма сөз кызматы билдиргендей, ОИИБге Сузак районунун 31 жаштагы тургуну арыз менен кайрылган. Ал өзүнүн арызында 2022-жылдын декабрь айынын ортолорунда Жалал-Абад шаарында такси кылып жүрүп, аял киши менен таанышкандыгын, ал менен социалдык тармакта сүйлөшүп жүргөндүгүн билдирген. Бул учурда аял киши “Жылаңач сүрөтүңүздү жөнөтүңүз” деп сактап алып, кийин “Жылаңач түшкөн сүрөттөрүңү интернетке таратам” деп коркутуп, акча талап кылып жүргөн. Аял киши өзүнүн дагы бир шериги менен акча талап кылуусун токтотпой, кийим-кече, үй-тиричилик буюмдарын алдырып, карыздарын төлөтүп, жалпы суммасы 187 000 сом акчасын коркутуп  алышкан. Алар азыркы учурда дагы токтоп калбастан коркутуп, акча талап кылып жатканын билдирип, мыйзам чегинде чара көрүп берүүнү суранган.

2023-жылдын 10-февралында бул факты Жалал-Абад ОИИБдин КБРне Кыргыз Республикасынын Кылмыш-жаза кодексинин 208-беренесинин (Опузалап талап кылуу) негизинде катталып, кылмыш иши козголгон.

Жалал-Абад ОИИБдин Экстремизмге жана мыйзамсыз миграцияга каршы аракеттенүү кызматынын (ЭММКАК) кызматкерлери тарабынан жүргүзүлгөн ыкчам-иликтөө иштеринин натыйжасында кылмыш ишине шектелип Сузак районунун Сузак айыл аймагынын тургуну 1983-ж.т. М.Н. жана Жалал-Абад шаарынын Курманбек кичи районунун тургуну 1987-ж.т. Р.М. кармалган. Алардан опузалап талап кылган 15 000 сом акча жана “WhatsApp” социалдык тармагында жазылган видео, аудио жана текст жазуулары алынган. Мындан сырткары тергөөнүн жүрүшүндө ыплас кылмыш ишине Сузак айылдык кеңешинин депутаты 1980-ж.т. А.А. жана Сузак районунун Сузак айыл аймагынын тургуну 1990-ж.т. А.Б. шериктеш болуп жүрүшкөндүгү такталган.

Жалал-Абад облустук милициясы жогорудагы кылмыш ишине шектүүлөрдөн жабыр тарткандарды (03722) 5 15 12 номерине кайрылышса болоорун эскертет.

Азыркы учурда тергөө амалдары жүрүүдө.