1,122 Бардыгы /

БАТКЕН. Баткен облусунда «сасык чайыр» өсүмдүгүн жыйноо жана соодалоо боюнча мыйзамсыз аракеттерге акыры бөгөт коюлду. Бул туурасында Улуттук коопсуздук мамлекеттик комитетинен билдиришти.

Расмий маалыматка караганда, УКМК кызматкерлери тарабынан жүргүзүлгөн ыкчам-издөө иш-чараларын уюштуруу учурунда Баткен шаарынын аймагында ак түстөгү «Тойота Эстима» унаасы кармалган. Унааны кароо маалында анын салонунда жана багажында «сасык чайыр» дары өсүмдүгү аталган 12 даана көлөмүндөгү 35 литрлик идиштери табылган. Маалымат үчүн айта кетээрибиз: Кыргыз Республикасынын аймагында сасык чайыр өсүмдүгүнүн майын чогултууга тыюу салынган.

Кармалган жүктүн жалпы салмагы 300 килограммдан ашык, көмүскө базардагы баасы 20 миң доллардан башталат. Ушул тапта бул кылмыш ишинин бардык жагдайларын ар тараптуу тактоо максатында тергөөгө чейинки иш-чаралар жүргүзүлүүдө.

Алишер ТОКСОНБАЕВ, өз кабарчы