6 Бардыгы /

Жалал–Абад облусунда 2025-жылдын жыйынтыгын чыгарган коллегияда Кыргыз Республикасынын Президентинин Жалал–Абад облусундагы ыйгарым укуктуу өкүлү Тилек Текебаев жабыркаган жарандарга камсыздандыруу сертификаттарын тапшырды.

Буга чейин Токтогул шаарындагы райондук маданият үйүнүн чатыры катуу шамалдын кесепетинен жабыркаган. Аталган мекеме ыктыярдуу мүлктү камсыздандыруудан өткөрүлгөндүктөн, келтирилген материалдык чыгымдын ордун толтуруу максатында 762 миң 562 сом өлчөмүндө камсыздандыруу төлөмү берилди.

Ошондой эле Кара-Көл шаарындагы Кетмен-Төбө аймагында жайгашкан турак үйдө чыккан өрт кырсыгынан улам 6 батир толугу менен күйүп кеткен. Милдеттүү турак жайды камсыздандыруудан өткөн төрт батирдин ээлерине 500 миң сомдон, жалпысынан 2 млн сом камсыздандыруу төлөмү тапшырылды.

Облус башчысы өз сөзүндө күтүлбөгөн кырдаалдарда камсыздандыруу жарандардын социалдык корголушун камсыз кылуучу негизги механизм экенин белгиледи. Ошондой эле калк арасында түшүндүрүү иштерин күчөтүү тапшырмасын берди.

Жалпы облус боюнча 2025-жылы 116 миң 475 объект камсыздандыруудан өткөрүлгөн. Анын ичинен 80 миң 394ү турак жай, 34 миң 637си автотранспорт каражаттары болуп саналат. Жыл ичинде 209 өрт жана башка кырсык катталып, анын ичинен 115 учур боюнча жалпысынан 10 млн 445 миң сом камсыздандыруу төлөмү жүргүзүлгөн.