685 Бардыгы /

«Эркин Европа/Азаттык» радиосу (РСЕ/РС) Тажикстан бийлигинен бул өлкөдөгү сегиз журналистин аккредитациядан өткөрүүнү жана аларга карата куугунтукту токтотууну талап кылды.

Шейшемби күнү Тажикстандын тышкы иштер министри Сирожидин Аслов менен жолуккан корпорациянын президенти Жейми Флай өлкөдөгү сөз эркиндигинин абалына байланыштуу тынчсыздануусун билдирди.

Ал тышкы иштер министрине кайрылып, радио кызматкерлеринин бул өлкөдө иштөөсүнө уруксат берүү үчүн аларды расмий аккредитациядан өткөрүүгө чакырды. Корпорациянын башчысы өкмөт «түрдүү булактардан маалымат алуу мүмкүндүгүнө ээ жарандар тажик коомчулугунун узак мөөнөттүү кызыкчылыктарына жооп бере турганын» түшүнөт деген үмүтүн билдирди.

Тажикстанда «Эркин Европа/Азаттык» радиосунун сегиз кызматкеринин иштөөсүнө тыюу салынган. Аларды өлкөнүн Тышкы иштер министрлиги аккредитациядан өткөрүүдөн баш тарткан. Буга чейин Аслов бийликте «Азаттык» радиосунун тажик кызматын жабуу ниети жок экенин билдирген. Ошол эле маалда ал макалалары менен мамлекеттик саясатка «зыян келтирип жаткан» кызматкерлер каттоодон өткөрүлбөй турганын айткан.

«Азаттык» радиосунун тажик кызматы мамлекеттик ЖМКларга альтернативдүү көз караштарды чагылдырган өлкөдөгү көп эмес маалымат булактарынын бири болуп эсептелет. Радионун YouTube каналына 737 000 колдонуучу катталып, ага жүктөлгөн видеолор өткөн жылы 200 миллион жолу көрүлгөн. Мындан тышкары радионун Facebook социалдык түйүнүндөгү баракчасына 176 000 колдонуучу катталып, маалымат алып турушат.

www.