755 Бардыгы /

“Эркин Европа/Азаттык” медиакорпорациясы Казакстан бийлигин радионун эки кызматкерине аккредитация берүүдөн баш тартканы үчүн сынга алды. RFE/RL муну медиаресурстун ишине кийлигишүү катары сыпаттады.

Аккредитация кабарчылар – Санат Урналиев менен Мария Мельниковага берилген эмес.

RFE/RL президенти Жейми Флай 19-февралда Казакстан тышкы иштер министри Мухтар Тлеубердиге жолдогон катында аккредитация берүүдөн баш тартууну “журналисттерге карата мыйзамсыз аракеттин акыркы мисалы” деп сыпаттаган.

Жейми Флай RFE/RL медиакорпорациясынын атынан иштеген жети кабарчыга 2019-жылы июнда мөөнөтүнөн мурда өткөн президенттик шайлоону чагылдырууга уруксат берилбегенин да эске салган. Флайдын пикиринде, муну менен казак бийлиги өлкө мыйзамдарын жана эл аралык милдеттенмелерин бузууда.

Корпорация башчысынын расмий катында аккредитация берүүдөн баш тартуу “Азаттыктын” Казакстан калкына коомдук олуттуу окуялар тууралуу кабардар кылуу миссиясына тоскоол болуп жатканы белгиленген.

Флай 2019-жылы “Азаттыктын” казак кызматынын кабарчыларына жасалган бир нече чабуул Казакстандын жаңы шайланган президентинин администрациясына, Башкы прокуратурага жана бир катар өкмөт мүчөлөрүнө арызданууга негиз болгонун айткан. Өкмөткө жолдонгон катта полициянын журналисттерди күч менен кармаганы, суракка алганы жөнүндөгү материалдар да тиркелген

Ал кабарчыларга кол салгандарга карата полиция чара көрбөй жатканын сынга алган.

Флай Казакстан тышкы иштер министрин “Азаттыктын” казак кызматынын журналисттерине токтоосуз түрдө аккредитация берүүгө чакырып, эл аралык милдеттенмелерин аткаруу зарылдыгын эске салган.

“Азаттыктын” казак кызматы казак жана орус тилдеринде маалымат таратып, бир нече платформада иш алып барат. 2019-жылы azattyq.org сайтына кирген окурмандардын саны 27,8 миллионго жеткен. 764 миң киши анын YouTube каналына, 413 киши Instagram баракчасына катталган.

www.