2,842 Бардыгы /

 Бүгүн Жалал-Абад шаарындагы Курманбек стадионунда 23-февраль – Ата-Мекенди коргоо күнүнө карата областтын бир катар район-шаарларынан келген окуучулардын катышуусунда спорттук мелдештер өтүүдө.

Жалал-Абад областтык ички иштер башкармалыгы уюштуруп жаткан саамалыкта – аралыкка чуркоо, таш көтөрүү, турникке тартылуу, граната ыргытуу, аркан тартышуу боюнча күч сынашып жатат.

Жалал-Абад областтык ички иштер башкармалыгынын башчысы Кылыч Жолдошевдин айтымында аталган иш-чара жаштарды эл-жерди сүйүүгө, мекенди коргоого болгон кызыгуусун арттырып, өспүрүмдөр арасындагы ар түрдүү терс көрүнүштөрдү болтурбоо максатын көздөйт.

“Бул иш-чара Ата Мекенди коргоочулар күнүнө карата Жалал-Абад областтык ички иштер башкармалыгы тарабынан уюштурулду. Област боюнча 10 мектептен 150 окуучу, 300 кызматкер катышып жатат. Бул иш-чаранын негизги максаты жаштарды, мектеп окуучуларын мекенди сүйүүгө аны коргоого, алардын патриоттук сезимдерин ойготуу болуп саналат. Ал эми демөөрчүлөрдүн жардамы астында 100 миң сомго мектептерге керектелүүчү компьютерлер, интерактивдүү доскалар, ноутбуктар ж.б. байгелер каралган. Мындан ары да бул сыяктуу иш-чараларды ар квартал сайын өткөрүп турабыз” – дейт Жалал-Абад ОИИБнын начальниги Кылыч Жолдошев.

Кошумчалай кетсек, буга чейин бул иш-чара бүт район-шаарларда өткөрүлгөн. Бүгүн Тогуз-Торо, Чаткал райондорунан башка бардык район-шаарлардын командалары катышып жатат.

Бүбүсара ОРОЗАЛИЕВА, “Аймак”