805 Бардыгы /

Тажик бийлиги Иран, Түштүк Корея жана Ооганстанда коронавирус жуктургандар катталгандыгына байланыштуу Ооганстан жана Өзбекстан менен чек арасында көзөмөл күчөтүлөрүн билдирди.

Маалыматка караганда, Ооганстандан келген адамдардын бардыгы санитардык көзөмөлдөн өтүп, жашаган жерине каттоого тургузула баштайт. Бүгүнкү күнгө карата мындай чаралар Кытайдан келген адамдарга карата гана көрүлүп жаткан.

Өлкөнүн саламаттык сактоо министринин орун басары Мирхамуддин Камолзода ушундай эле чаралар Өзбекстан менен чек арада да көрүлүп жатканын билдирди. Анын айтымында, Түштүк Кореядагы тажик жарандарынын көбү Ташкент аркылуу келүүдө.

Министрдин орун басары жакынкы күндөрү чек ара көзөмөлүн күчөтүүдөн тышкары башка чаралар да көрүлө баштай турганын кошумчалады. «Бул чаралардын арасында аталган үч өлкөдөн келген бардык адамдарды карантинге жаткыруу варианты да бар», – деди Камолзода.

Түштүк Кореяда окуган айрым тажик студенттери бул өлкөнүн Душанбедеги элчилиги виза берүү тартибин катаалдатканын билдиришүүдө. Азырынча элчиликтин өзү бул маалымат боюнча комментарий бере элек.

Ал ортодо Дүйнөлүк саламаттык сактоо уюму дүйнө коомчулугу коронавирустун ыктымал пандемиясына даяр болушу керектигин эскертти.

Тажик бийлиги бүгүнкү күнгө карата өлкөдө коронавирус жуктургандар жок экенин билдирди. Саламаттык сактоо министрлигинин маалыматына караганда, учурда Кытайдан келген 882 адам карантинде жатса, алардын 266сы дарыгерлердин көзөмөлүндө.

Акыркы маалыматтар боюнча Кытайда вирусту жуктургандардын саны 77 миңге жакындап, дээрлик 2 600 адам каза болду. Мындан тышкары 20 миңден ашык адам бул оорудан айыкты.

www.