1,462 Бардыгы /

Жалал-Абаддагы дарыканаларда медициналык каражаттардын анын ичинде шприц, система, беткап жана бахила таңкыстыгы жарала баштады.

Мындай пикирди фармацевтикалык компаниялардын облустагы өкүлдөрү  өкмөттүн Жалал-Абад областы боюнча  ыйгарым укуктуу өкүлүнүн орун басары Ырысбек Ызабеков менен болгон жолугушууда  билдиришти.

Фармацевтикалык компаниялар Россиядан шприц жана системалар келбей калгандыктан мындай каражаттарды акыркы 10-12 жылдан бери өлкөгө бир гана Кытайдан алып жатышкан. Учурда бул медициналык каражаттар коңшу өлкөдөн келбей калгандыктан учурда таңкыстык бар экенин “Тоскоол-Ата” ЖЧКсынын директору Оңолбек Батырбеков да айтып өттү.

“Учурда ар бир аптекага күн сайын 50дөн система жана 100даанадан шприцтерди берип жатабыз. Үнөмдөө  жолу менен биздин кампадагы бар каражаттарды 15-20 күнгө чейин жеткиребиз. Ал аралыкта Бишкектеги чоң компанияларга кайрылабыз, эгер аларда да жок болсо колубуздан эч нерсе келбей калышы толук мүмкүн. Учурда биздин жоопкерчилиги чектелген коомдун облус аймагында 13 гана дарыканасы болсо да, февраль айынын башынан бери беткаптарды сатпай жатабыз. Анткени ага чейин беткаптар сатылып бүткөн”,-деди О. Батырбеков

Алты күндөн бери Жалал-Абад шаарындагы дарыканаларда беткаптар сатылбай жатканы тууралуу маалымат түшкөндүгү тууралуу Өкмөттүн Жалал-Абад облусундагы ыйгарым укуктуу өкүлүнүн орун басары Ырысбек Ызабеков төмөнкүлөрдү билдирди.

“Бул багытта бүгүн облус аймагында ишмердүүлүгүн жүргүзүп келе жаткан фармацевтикалык компаниялардын өкүлдөрү  менен жолугуу өткөрдүк. Мында бир жолу колдонулуучу беткаптар калбай калгандыктан айрым компаниялар марлиден беткаптарды тигүү цехтерине тиктирип 15 сомдон сатып жатканы тууралуу айтылды. Бүгүн атайын комиссия түзүлүп бет каптар кандай шартта тигилип жатканын көрүп чыккан соң, эгер талапка жооп берсе тигүү цехтеринин жетекчилери жана фармацевтикалык компаниялардын өкүлдөрү менен дагы жолугуп, калктын беткапка болгон муктаждыгын жоёбуз. Ал эми медициналык каражаттарга жаралып жаткан таңкыстык боюнча өкмөткө билдиребиз”,-деди Ы.Ызабеков.

Ал эми жолугушуунун жүрүшүндө кадимки марлиден тигилип жаткан беткаптардын санын көбөйтүү, бул багытта тигүүчү цехтер менен сүйлөшүү жүргүзүү керектиги тууралуу да айтылды. Мындан сырткары жакынкы күндөрү Россиядан Кыргызстанга 1миллион даана беткап алынып келинери кошумчаланды.

Акылай КАРАБАЕВА, “Аймак”