1,689 Бардыгы /

Жаз-жай айларынын келиши менен айыл чарба техникаларын оңдоо иштери башталган чакта айыл чарба техникалары жакшы ремонт болбой, кыймылдаткычтардын ар кайсы жерлеринен май агып, электр өткөргүчтөрдүн кабыкчалары желип, өрттүн чыгышына себеп болуп калууда. Мындай пикирин Сузак райондук ӨКБнүн ӨӨжААБнүн улук офицери, капитан А.Иманов билдирди.

Андыктан талаада иштеп жаткан комбайндар үчүн электр өткөргүчтөрдөн, кыймылдаткычтагы майдан өрт чыгып кетишинин алдын алып, алардын чөп-чардан таза болуусуна көңүл буруу керек. Бул үчүн баштапкы өрт өчүрүүчү шаймандарды суу менен камсыздоо, чөп ташууда трактор, автоунаалардын түтүн чыгуучу жайларына учкун кармагычтарды орнотуу, эгин талаасында тамеки тартпоо зарыл.

Дагы бир коркунуч алып келүүчү нерсе айыл чарба техникаларына күйүүчү майды куюу. Аны атайын башка бөлүнгөн коопсуз жайда жүргүзүү керек.

Комбайндарды оңдоо жана аларды талапка жооп берерлик даражада баштапкы өрт өчүргүч шаймандар (фляга суусу менен, кийиз, кум) менен камсыз кылуу жагы аймактык жетекчилер жана техсервистердин башчылары тарабынан катуу көзөмөлгө алынышы керек.

Кошумчалай кетсек, буга чейин Сузак районунун Көк-Арт айылында дан эгиндери орулган 2 гектар жер аянты күйгөн болчу. Мындай өрт кырсыктарын болтурбоо, анын алдын алуу максатында ӨКМдин Сузак райондук бөлүмү жогорудагы эрежелерге так болушунуздарды эскертет.

“Аймак”