1,080 Бардыгы /

ОШ. Кара-Суу районунун мурдагы акими Тилек Матраимов эки жакын адамы менен былтыркы октябрдагы элдик толкундоодон кийин Өзбекстандын Анжиян шаарына кире качаарда, коңшу өлкөнүн чек арачылары тарабынан дароо кармалган.

Ош облустук сотунун чечимине ылайык Тилек Матраимовго 220 миң сом айып пул салынып, эркиндикке бошотулду. Сотто аныкталган далилдерге караганда, Тилек Матраимов 2020-жылдын 6-октябрь күнү саат 23:30дар чамасында Жалал-Абад облусунун Сузак районундагы чек ара көзөмөл-өткөрүү бекети жайгаштырылбаган аймактан Өзбекстанга мыйзамсыз эле чыгып кеткен. Андан соң коңшу өлкөнүн чек арачылары тарабынан Анжиян облусунун Кургантепе районунун Яртибош айылынан гана кармалган.

Ошентип, Тилек Матраимов Жазык Кодексинин 358-беренеси (“Мамлекеттик чек арадан мыйзамсыз өтүү”) менен кылмыш жасаган. Ош облустук соту аны 2020-жылдын 22-октябрында күнөөлүү деп таап, 2 200 эсептик көрсөткүч (220 миң сом) өлчөмүндө айып салуу жазасы берилген. Ал эми үй камагында кармоо баш коргоо чарасы күчүндө калтырылган. Ошондой эле экинчи тарап жогорку инстанцияга таптакыр даттанбагандыктан, соттун өкүмү 30 күндүн аралыгында күчүнө кирип, Тилек Матраимов жазадан толугу менен бошотулганы белгиленди.

Эске салсак, Тилек Матраимов жана анын эки жакын адамы Кыргыз-Өзбек чек арасынан Өзбек чек арачылары тарабынан өткөн жылдын 6-октябрында кармалган.Коңшу өлкө аларды 9-октябрда кайрадан Кыргызстанга өткөрүп берген. Ал эми Тилек Матраимов ошол эле жылдын 15-октябрда ңй камагына чыгарылган.

Алишер ТОКСОНБАЕВ “АЙМАК”