861 Бардыгы /

Жапон бийлиги Токиодо өтө турган жайкы Олимпиада оюндары болбой калышы ыктымал экенин кыйытты. Бул тууралуу башкаруучу Либералдык-демократиялык партиянын башкы катчысы Тосихиро Никаи билдирди.

Никаинин айтымында, эгер коронавируска байланыштуу абал начарлап, COVID-19ду жуктургандардын саны көбөйсө, Олимпиада оюндарын өткөрүү өтө оор болот жана мелдешти токтотуу варианты каралышы мүмкүн.

Жапониянын эмдөө иштерине жооптуу коргоо министри Таро Коно “Асахи” телеканалына берген маегинде Токиодо Олимпиада жана Паралимпиада оюндары толугу менен көрүүчүлөрсүз өтүшү ыктымал экенин айтты. Буга чейин уюштуруучулар мелдештерди чет өлкөлүк күйөрмандарсыз өткөрүү жөнүндө чечим кабыл алышкан.

Токиодогу Жайкы Олимпиада оюндары былтыр болмок, бирок коронавирус пандемиясына байланыштуу 2021-жылдын июль айына жылдырылган.

Январда The Times гезити жапон өкмөтүндөгү булагына таянуу менен Токио пандемияга байланыштуу Олимпиада оюндарын токтотууну чечкенин кабарлаган.

“Жапон бийлиги “жүзүн сактап калуу менен” бул чечимди дүйнө жүзүнө жарыялоо жолдорун издеп жатат. “Эч ким бул тууралуу биринчи үн каткысы келбейт, бирок баары Олимпиада өткөрүү оор болорун түшүнүп турат”, – деген басылманын булагы.

Анда Эл аралык Олимпиада комитетинин башчысы Томас Бах азырынча Токиодо өтө турган Олимпиада оюндарын жылдыруу жөнүндө кеп жок экенин айткан.

Апрелде Kyodo агенттиги жүргүзгөн сурамжылоого ылайык, Жапонияда респонденттердин 72% Токиодогу Олимпиада оюндарынын токтотулушун же кийинкиге жылдырышын каалай турганын билдиришкен.

WWW.