1,050 Бардыгы /

Германия беларус-поляк чек арасына жакын жердеги лагерде жашап жаткан 2000 мигрантты кабыл алуу тууралуу Минсктин сунушун четке какты. Бул тууралуу “Немис толкуну” Германия өкмөтүнүн расмий өкүлү Штеффен Зайбертке шилтеме кылып кабарлады.

“Германия менен Европа биримдиги Александр Лукашенконун бул сунушун кабыл ала албайт”, — деп билдирген Зайберт.

Ал ортодо беларус укук коргоо органдары мигранттарды чек ара аймагына жеткирүүнү улантууда. Польшанын чек ара кызматы 21-ноябрда 150 киши Дубиче-Церкевне шаарчасына жакын жердеги тосмодон өтүүгө аракет кылганын билдирди. “Немис толкуну” кабарлагандай, ал мигранттардын аракетин беларус атайын кызматы көзөмөлдөп турган.

Александр Лукашенко өткөн жумада Меркель менен телефон аркылуу сүйлөшкөндө Берлинге лагердеги 7000 мигранттын 2000ин кабыл алуу өтүнүчү менен кайрылганын билдирген. Анын айтымында, Меркель бул өтүнүчтү карап көрүүнү убадалаган.

Өткөн жумада Меркель бул аракети Германияда жана ЕБдин башка өлкөлөрүндө сынга алынганына карабастан Лукашенкого эки жолу телефон чалган. Германия өкмөтүнүн расмий өкүлү Штеффен Зайберттин айтымында, бул Лукашенкону “легитимдештирүү актысы” эмес, чек арадагы оор гуманитардык кырдаалды жакшыртуу аракети болгон.

Өткөн жумада Евробиримдик Беларустагы мигранттарга гуманитардык жардам катары 700 миң евро бөлүп бере турганын билдирген.

Жакынкы Чыгыштан ташылып келинген мигранттар Беларустун аймагы аркылуу Европага кирүүгө аракет кылууда. Буга өбөлгө түздү деп Евробиримдик Минскти айыптоодо.

WWW.