2,526 Бардыгы /

          ОШ. Кыргызстандын Түштүк башкалаасынын биринчи вице-мэри Марс Исаев шаардын бюджети 242 миллион сомго көбөйгөндүгүн шардана кылды.

          Марс Исаевдин айтымында, былтыр салык төлөмдөрү мыкты өсүп, анын эсебинен бюджеттин киришеси 197 миллион сомго арбыган эле. Ушундан улам быйыл шаар казынасы 242 миллион 810 миң сомго дагы жогорулады. Мындан тышкары муниципалдык менчик башкармалыгынын балансында турган ижара обьектилеринин, борбордук базардын соода түйүндөрү жана автоунаа базарынын ижара акылары ого бетер көтөрүлдү.

          2022-жылга Ош шаарынын жалпы бюджети 1 миллиард 600 миллион 510 миң сом деп бекитилген. А былтыр казынанын көлөмү 1 миллиард  365 миллион  сомду чапчыган. Ош шаарында ушул тапта расмий түрдө 350 миң калк жашайт, ал эми бейрасмий маалыматтарга караганда, 600 миңге жакын адым байырлайт деп айтылып келатат.     

Алишер ТОКСОНБАЕВ, өз кабарчы