1,047 Бардыгы /

БАТКЕН. Кыргыз Республикасынын билим берүү жана илим министри Болотбек Купешев Баткен районунун Кыштут Айыл Өкмөтүнө караштуу Газ орто мектебинин жаңы курулуп бүткөн окуу корпусунун ачылыш аземине катышты. Ошондой эле ушул райондогу Кара-Бак Айыл Өкмөтүнө караштуу Дөбө орто мектебине баг багып, педагогикалык жамаат менен жолугушту.

Аталган иш-чарага ошондой эле аталган министрликтин статс-катчысы Калысбек Шадыханов, Кыргыз Республикасынын Президентинин Баткен облусундагы ыйгарым укуктуу Өкүлү Абдикарим Алимбаев, Баткен райондук билим берүү бөлүмүнүн башчысы Олжобай Мажилимов, мындан тышкары мугалимдер, окуучулар жана жергиликтүү тургундар катышышты.

Өкмөт мүчөсү Болотбек Купешев иш-чаранын катышуучуларын жаңы окуу жылынын башталышы менен чын ыкластан куттуктап, билим уясынан Кыргызстандын Туусун бийик көтөргөн, даңкын далайга чыгарган уул-кыздар учуп чыгышына чын дилинен тилектештигин ачыктады. Андан соң Билим берүү жана илим министри Кара-Бак Айыл Өкмөтүнө караштуу Дөбө орто мектебине баш багып, педагогикалык жамаат менен маңдай-тескей жолугушту. Кездешүү учурунда министр аталган мектептин кошумча окуу корпусунун курулушуна жумшоо үчүн Жусуп Баласагын атындагы Кыргыз мамлекеттик университетинин эмгек жамаатынын атынан 1 миллион сомдук акча каражатынын сертификатын тапшырды.

Айтмакчы, Газ орто мектеби үч корпустан турат. 160 орунга эсептелинген №3 окуу корпусу 1978-жылы курулган. 50 орунга эсептелинген №2–окуу корпусу 1974-жылы курулган. Ал эми 1936-жылы курулган №1–окуу корпусу 2012-жылдын 9-апрелинде пайдаланууга жараксыз деп табылган. Ушул тапта бул мектепте 362 окуучу эки нөөмөттө окуп жатышат. Булардын арасынан 32 окуучу 2021-2022-окуу жылында алгач ирет мектеп босогосун аттады.

Алишер ТОКСОНБАЕВ, өз кабарчы