984 Бардыгы /

     Урматтуу Жалал-Абад облусунун тургундары!

     Сиздерди Кыргыз Республикасынын Президентинин Жалал-Абад облусундагы ыйгарым укуктуу өкүлүнүн аппаратынын жана жеке өзүмдүн атымдан 31-август, өлкөбүздүн эгемендүүлүк майрамы – Кыргыз Республикасынын көз карандысыздыгынын 31 жылдыгы менен чын дилимден куттуктайм!

Кайталангыс карт тарыхка ээ кыргыз эли кылымдар бою эркиндик үчүн күрөшүп, эгемен жолду улантып келишет. Бирде толуп, бирде бөксөрүп турса да, ар убак айбаттуу, тарых бүктөмүндө унут калбастан уюткулуу улут катары калыптанып, даӊктуу жолду басып өтүшкөн.

      Дүйнөдө теӊдеши жок Манас эпосун жалпы адамзатка мураска калтырып, бийиктикке умтулган көчмөн маданиятты түптөшкөн. Андыктан бабалардын баскан изин унутпай, алар баштап кеткен жолун мурастап калуу баарыбыздын милдетибиз. Албетте бул жылдар аралыгында эгемен Кыргызстаныбыз өтө татаал жолду басып өттү.

       Ардактуу Жалал-Абад облусунун тургундары!

Өзүңүздөргө белгилүү болгондой, өлкө жетекчилигибиз тарабынан аймактарды өнүктүрүү, калктын социалдык-экономикалык абалын жакшыртуу аракеттери колго алынды. Буга мисал, “Кумтөр” алтын кени толугу менен Кыргызстандын карамагына өттү. Мугалимдердин, медицина, маданият, мамлекеттик жана муниципалдык кызматкерлердин айлык маяналары сезилээрлик деңгээлде  жогорулады. Жасалып жаткан бул аракеттердин баарын элге болгон мамлекеттин камкордугу деп айтсак болот. Бул жылы Жалал-Абад облусунда социалдык мекемелерди куруу, жол оңдоо, инфратүзүмдү жакшыртууга басым жасалып жатат. Ошол эле учурда жумуш орундарын түзүү, өндүрүштү жандантуу аракети да көрүлүп жатат. Алсак, бул жылы облус боюнча 90 чакырымдан ашуун жолго асфальт төшөө каралып, азыркы учурда анын 50 пайыздан ашууну аяктап калды. Дагы бир чоң долбоорлордун бири Ала-Бука-Чаткал жолунун 70 чакырымынан ашуун аралыгын асфальттоо менен эл аралык стандарттарга ылайык келтирүүгө басым жасалууда.

         Урматтуу облус жашоочулары!

       Биздин эң негизи максатыбыз эл түйшүгүн жеңилдетип, облустун бардык аймактарын өнүгүүсүнө шарт түзүү. Мында эң башкысы тургундарыбыздын бийликтин бүгүнкү жүргүзүп жаткан саясатын туура кабыл алуу, кемчиликтерин айтып, жергиликтүү бийлик жетекчилери менен ынтымактуулукта иш алып баруу саналат. Дагы бир жолу сиздерди эгемендүүлүгүбүздүн 31 жылдыгы менен куттуктайм! Асманыбыз бүркөлбөй, түндүгүбүздөн күн нуру чачыраган кызыл байрагыбыз бийиктерде желбирей берсин!

     Өлкөдө тынчтык өкүм сүрүп, кыргыз эли кырсыктардан алыс болсун! Көп улуттуу мамлекетибизде биримдиктин ыры ырдалып, наристелердин кубанычтуу күлкүсү ар дайым жаӊырып турсун!

     Дагы бир жолу эгемендүүлүк майрамыңыздар менен!

Абсаттар СЫРГАБАЕВ, Кыргыз Республикасынын Президентинин Жалал-Абад облусундагы ыйгарым укуктуу өкүлү