1,254 Бардыгы /

ЖАЛАЛ-АБАД. Кечээ, 7-февралда Жалал-Абад ОИИБдин начальнигинин орун басары Ильяз Касымбаев Сузак райондук мамлекеттик администрациясында район жетекчилери менен жолугушту.

Жалал-Абад ОИИБдин басма сөз кызматы билдиргендей, жолугушууга Сузак районунун акими Баратбек Сыдыкназаров, айыл өкмөт башчылары жана Көк-Жаңгак шаарынын мэри катышты. Ильяз Касымбаев кылмыштуулуктун алдын алууда, коомдук тартипти жана жол кыймылынын коопсуздугун камсыз кылууда милиция менен жергиликтүү бийлик өкүлдөрүн тыгыз кызматташтыкта иш алып барууга чакырды. Катталган кылмыштардын бетин ачууда жана коопсуздук үчүн заман талабына ылайык видеокамераларды район аймагына орнотуу сунушун айтты. Адамды жүзүнөн тааный турган камералар 360 градуска айланып, 500 метрге чейин жакындатуу функциясы бар экендигин белгиледи. Камералар Сузак РИИБге жана ИИМге туташтырылып, онлайн иштей тургандыгын жана аны көзөмөлдөп турган кызматкерлер болоорун айтты. Санариптештирүү багытында жергиликтүү бийлик өкүлдөрүн жакындан колдоо көрсөтүп, түрдүү кырсыктардын алдын алуу сунушун билдирди.

Жолугушууда кайсы жерлерге кандай видеокамераларды коюу керектиги талкууланды. Сузак районунун акими Баратбек Сыдыкназаров милиция менен кызматташтыкта иш жүрүп жаткандыгын белгиледи. Ошондой эле кылмыштуулукка каршы күрөшүүдө жергиликтүү бийлик өкүлдөрү кайдыгер эместигин, жергиликтүү бюджеттерден видеокамераларды орнотууга акча каражаттарын бөлө тургандыгын белгиледи.

Жыйынтыгында айыл өкмөт башчылары өздөрүнүн бюджеттерине жараша заманбап видеокамераларды орнотуу сунуштарын сессияларга кое турган болушту. Андан соң бөлүнгөн акча каражатына жараша район аймагына видеокамералар орнотулат.