780 Бардыгы /

Өзбекстан Республикасынын борбору Ташкентте “Эксперттик жана
соттук-эксперттик ишмердүүлүк: көйгөйлөр, перспективалар жана
инновациялар” аттуу эл аралык илимий-практикалык конференция болуп өттү.Бул тууралуу ИИМдин басма сөз кызматы билдирди.
Ташкенттеги Гибрид форматында өткөн иш-чарага жергиликтүү жана эл аралык уюмдардын, ШКУга мүчө-өлкөлөрдүн, ошондой эле Түркия, Түштүк Корея, Италия, Сауд Арабиясы, Бириккен Араб Эмираттарынын эксперттери катышты.
Кыргыз Республикасынын атынан ИИМдин Криминалистика кызматынын
ардагерлер кеңешинин төрагасы, милициянын отставкадагы полковниги Канат
Иманалиев катышты.
Жыйындын жүрүшүндө соттук-медициналык экспертизанын учурдагы абалы
боюнча баяндамалар угулду. Адистер мамлекеттик жана мамлекеттик эмес
уюмдардагы соттук-эксперттик изилдөөлөрдүн сапатынын көйгөйлөрүн,
заманбап эксперттик технологияларды өркүндөтүүнүн жолдорун, соттун, сот
процессинин катышуучуларынын жана эксперттик уюмдардын ортосундагы өз
ара аракеттенүүнүн процесстик, укуктук жана уюштуруучулук маселелерин
талкуулашты. Көз карандысыз экспертизанын потенциалын чыңдоонун маанилүү
ролу баса белгиленди.
«Конференция кылмыштуулукка каршы биргелешип күрөшүүдө күч-аракеттерди
бекемдөөгө жана андан ары өнүктүрүүгө салым кошот деп ишенем. Мындай эл
аралык конференцияларды өткөрүү, албетте, соттук-эксперттик системанын
өнүгүшү үчүн чоң мааниге ээ. Ишкердик байланыштарды кеңейтүү жана
активдештирүү эксперттер мамлекеттик жана мамлекеттик эмес болушуна
карабастан, эксперттик уюмдардын ортосундагы өз ара аракеттенүүнүн
деңгээлин жогорулатууга өбөлгө түзөт. Көп жагынан алганда,
жолугушуулардын, конференциялардын, кеңешмелердин жүрүшүндө
концептуалдык, стратегиялык өнүгүү пландарынын негизинде жакынкы
келечекке биргелешкен аракеттердин приоритеттүү линиясы иштелип чыгат»,- деп белгиледи Канат Иманалиев өз баяндамасында.
Иш-чаранын жүрүшүндө криминалисттик экспертиза жаатында эл аралык
стандарттарды жана чет өлкөлүк алдыңкы тажрыйбаны киргизүү, илимий жана
техникалык негиздемелери бар далил базасын чогултуу процесстерин
өркүндөтүү, криминалисттик ыкмаларды жана каражаттарды колдонуу,
санариптик экспертизаны кеңири колдонуу сыяктуу багыттар боюнча маанилүү
сунуштар чыкты.
Күндүн экинчи жарымында конференциянын катышуучулары криминалистикалык
ишмердүүлүк чөйрөсүндө колдонулуп жаткан атайын техникалар жана
жабдуулар, Өзбекстан Республикасынын ИИМдин Академиясында жөнгө салынган
заманбап окуу процесстери, окуу-лабораториялык кабинеттер менен
таанышышты.