924 Бардыгы /

ОШ. Улуттук коопсуздук боюнча мамлекеттик комитети (УКМК) мекемелер аралык жумушчу тобу менен бирге Ош облусундагы диний жайлардын ишмердигин тыкыр текшерди. Иш-чара «Диний чөйрөдөгү мамлекеттик саясаттын концепциясын» жүзөгө ашыруу боюнча жүргүзүлүп жаткан иштин алкагында ушул жылдын 20-июлунан тартып башталган.

Натыйжада 39 мечиттин жана 21 медресенин ишмердиги убактылуу токтотулду. 39 диний жана сыйынуу жайларына айып пул салынды. 48 мечитке жана 40 медресеге өрт коопсуздугунун талаптарын одоно бузгандыгы үчүн акты түзүлгөн. Текшерүү маалында айрым мечит-медреселердин башаламан курулушу, архитектуралык-курулуш жана санитардык-эпидемиологиялык талап-ченемдердин сакталбаганы, медреселердеги билим берүүнүн бирдиктүү стандарттарынын жоктугу, «хужра», «таалим», «дарс» ж.б. диний билим берүү жараяндарына көзөмөлдүн таптакыр жоктугу аныкталды. Ал эми 39 мечит каттоого алынган эмес, тиешелүү документтери дагы текшерүү маалында жок болгон.

Кыскасы, диний жайларды текшерген мекемелер аралык жумушчу топко атайын кызматтан, Ички иштер министрлигинен, дин иштери боюнча мамлекеттик комиссиядан, өзгөчө кырдаалдар министрлигинен, саламаттык сактоо министрлигинен, муфтияттын, президенттин Ош облусундагы ыйгарым укуктуу өкүлчүлүгүнөн жана «Кадастр» мамлекеттик мекемесинен өкүлдөр киришкен. Кыргызстанда жалпысынан 3,5 миңден ашуун диний2 уюм мамлекеттик каттоодон өткөрүлгөн. Өлкөбүздө 2,6 миңдей мечит, 100дөй медресе, 10 ислам институту бар. Христиан багытындагы уюмдардын саны – 399, калгандары башка диндерге таандык.

Баса, Дин иштери боюнча мамлекеттик комиссиянын маалыматына караганда, 21 уюм деструктивдүү, экстремисттик жана террористтик деп табылып, сот чечими менен өлкө аймагында ишмердигине тыюу салынган. Алардын катарында «Хизб ут-Тахрир», «Йакын инкар» жана башкалар бар.

Алишер ТОКСОНБАЕВ, өз кабарчы