372 Бардыгы /

Баткен жергесинде инвестиция тартуу жана бизнести өнүктүрүү боюнча атайын Кеңеш түзүлдү. Бул туурасында Кыргыз Республикасынын Соода-өнөр жай палатасынын басма сөз кызматынан маалымдашты.

Ошентип, өрүкзар Мекенинде аймактагы ишкерликти өнүктүрүү маселеси боюнча Кеңештин кезектеги жыйыны өтүп, бул иш-чарага президенттин Баткен облусундагы ыйгарым укуктуу өкүлү, район-шаарлардын акимдери, тиешелүү министрликтердин, жергиликтүү өз алдынча башкаруу органдарынын жана дагы бизнес чөйрөсүнүн өкүлдөрү катышышты.

Президенттин Баткен облусундагы ыйгарым укуктуу өкүлү Абдыкарим Алимбаев облустун бардык шаар жана райондорунда ушундай Кеңешти түзүп, ошону менен ишкерлерге үзгүлтүксүз көмөк көрсөтүүнү тапшырды. Мындан тышкары Соода-өнөр жай палатасынын Баткен облусундагы өкүлү Данияр Абдуллаев инвестиция тартуу жана бизнести өнүктүрүү боюнча Кеңештин мүчөлүгүнө бекилди.

Аталган кеңешменин соңунда Кыргыз Республикасынын Соода-өнөр жай палатасынын жетекчиси Темир Сариев ар кыл тармактардын, логистикалык борборлордун жана фармацевтика тармагынын жана башка тармактардын өкүлдөрүнөн турган палатанын 12 жаңы мүчөсүнө сертификаттарды тапшырды.

Алишер  ТОКСОНБАЕВ, өз кабарчы