24 Бардыгы /

Кыргыз Республикасынын Министрлер кабинетинин төрагасынын орун басары – Улуттук коопсуздук мамлекеттик комитетинин жетекчиси Камчыбек Ташиев Баткен облусун караштуу Лейлек районундагы «Кайрагач» чек ара заставасын ачылыш аземине катышты.

Атайын кызматтын маалыматына караганда, Лейлек районундагы «Кайрагач» чек ара заставы 2012-жылы курулуп башталып, бирок бүткөрүлбөй, кайра кароосуз калган. Камчыбек Ташиевдин жеке көзөмөлү астында курулуш иштери кыска мөөнөттө заманбап шарттары менен бүткөрүлдү. Ошентип, эми «Кайрагач» чек ара заставасы заман талабына толугу менен жооп берет жана чек арачылардын кызматтык милдеттерин так аткарышы үчүн бардык тийиштүү аскердик каражаттар менен камсыз этилген. Мончо, спорт комплекси жана аскер кызматкерлеринин эс алуусу үчүн да тийиштүү шарттар каралган.

Кыргыз Өкмөтүнүн мүчөсү Камчыбек Ташиев түзүлгөн шарттар менен жеринде таанышып чыгып, чек арачыларды кызуу куттуктады жана кызматтык милдеттерин так аткарууга, ошондой эле мыйзамды кынтыксыз сактоону эскертти: – Мамлекетибиз тарабынан, урматтуу президентибиз тарабынан сиздер үчүн ушунчалык көңүл бурулуп, чек арабыздын бекем болушу үчүн болгон мүмкунчулүктөр колдонулуп жаткандан кийин, Сиздер дагы өз милдеттериңди так, берилгендик менен жана мыйзамды кынтыксыз сактоо менен аткарышыңар кажет! Араңарда анча-мынча мыйзамсыздыктарга жол берип жаткандар бар экендигин мен билемин. Эгерде тез арада ал кемчиликтерди жойбосоңор, мен тараптан катуу жана катаал чаралар көрүлөт! Мекенибиздин чек арасын, тынчтыгын жана коопсуздугун сактоодо эч кандай маселе болбошу керек! – деди Камчыбек Ташиев.

Убада канчалык даражада аткарылат. Албетте, аман турсак, көрө жатаарыбыз…

Алишер ТОКСОНБАЕВ, өз кабарчы