2,112 Бардыгы /

        БИШКЕК. Келаткан 2023-жылдын апрель айында Чыгыш Европа, Кавказ жана Борбор Азия чөлкөмүндө инновациялык жана жапжаңы 12 айлык сертификатка негизделген информатика жана маалымат илими (IDASH) программасы өз ишин баштамакчы.

Ал эми Бишкек шаарында Украинанын, Грузиянын, Кыргызстандын, Өзбекстандын жана Казакстандын Саламаттыкты сактоо министрликтеринин өкүлдөрү коомдук саламаттыкты сактоонун маалымат тутумдарын түзүүгө жана ырааттуу пайдаланууга багытталган, калктын ден соолугун чыңдоо үчүн ишенимдүү жана өз убагында маалыматты талдоого, жайылтууга жана пайдаланууга жол берген IDASH тренинг пакетинин үстүндө иштөөнү ийгиликтүү аякташты.

 – Мындай иш-чаранын Чыгыш Европа жана Борбор Азия мамлекеттеринин катышуусунда өткөрүлгөнү биз үчүн абдан эле маанилүү! COVID-19 пандемиясы эпидемиологиялык көзөмөлдү, инфекциялык көзөмөлдү жана мониторинг куралдарын кароону камтыган өзгөчө кырдаалдардын кесепеттерин жоюу үчүн санариптик чечимдердин эбегейсиз зарылдыгын кашкайта көрсөтпөдүбү, – деди Кыргызстандын Ооруларды алдын алуу жана мамлекеттик санитардык-эпидемиологиялык көзөмөл департаментинин директору, доктор Абдыкадыров Султан.

Баса аталган долбоорду ырааттуу иштеп чыгууда программанын концепциясына жана жүзөгө ашырылышына башынан эле ээ болгон көп өлкөнүн өкүлчүлүгүн жана аймактагы кызыкдар тараптарды камтыган биргелешкен долбоорлоо жараяны пилоттук түрдө өткөрүлдү.

CDCтин Кыргызстандагы Өкүлчүлүгүнүн директору жана ВИЧ-СПИД жана кургак учук боюнча Регионалдык программанын директору доктор Патрик Надоль өз сөзүндө: – Сиздер бул инновациялык программаны иштеп чыгуу жана жүзөгө ашыруу үчүн иштеп жаткан команданын бир бөлүгүсүздөр [жана ] ага ээлик кылуунун жана өнүгүүнүн белгилүү бир даражасы бар, аны [IDASH программасын] алдыга жылдыруу абдан кызыктуу! – деп кашкайган чындыкты акыры моюндады.

Баса, IDASH Украина, Грузия, Кыргызстан, Өзбекстан, Казакстан, АКШнын Ооруларды көзөмөлдөө жана алдын алуу борборлору (CDC), Вашингтон университети жана ДСУ-Европа аймактык кеңсесинин ортосундагы кызматташтыкты ого бетер кеңейтүүгө гана өбөлгө жаратат.

Алишер ТОКСОНБАЕВ, өз кабарчы