33 Бардыгы /

Кыргызстан «Талибан» кыймылын террористтик уюмдардын тизмесинен чыгарды. Бул туурасында Кыргызстандын Тышкы иштер министрлигинен билдиришти.

Ошентип, Кыргыз Республикасынын Тышкы иштер министрлиги өлкөнүн компетенттүү мамлекеттик органдары кылдаттык менен карап чыгып, ар тараптуу баа бергенден кийин «Талибан» кыймылын Кыргыз Республикасынын аймагында тыюу салынган уюмдардын тизмесинен чыгаруу чечими кабыл алынгандыгын тастыктады.

Мындай чечим Борбор Азияда аймактык туруктуулукту бекемдөөгө жана өз ара диалогду улантууга гана багытталган. Кыргыз Республикасы Ооганстанда жана бүтүндөй аймакта туруктуу жана тынчтык чөйрөнү камсыз кылууга багытталган Эл аралык коомчулуктун күч-аракеттерин колдоого бекем умтулат.

Ал эми мунун алдында Ооганстандын Тышкы иштер министрлигинин атайын сайтына Кыргызстандын чечимине терең ыраазычылык айткан билдирүү 5-сентябрда жарыяланган.

Анда Ооганстан Кыргызстандын «Талибанды» тыюу салынган уюмдардын тизмесинен чыгарган чечимин жогору баалай тургандыгы, бул өлкөлөр ортосундагы өз ара саясий жана экономикалык мамилелердин мындан ары бекемделишине гана өбөлгө түзөөрү баса белгиленген.

Баса, Кыргызстандын Башкы прокуратурасы ушул жылдын 2-сентябрында террорчул жана экстремисттик уюм сыңары Кыргызстандын аймагында таптакыр тыюу салынган 20 диний бирикменин тизмесин жарыялаган.

Анда «Талибан» кыймылы жок экендигин көрөсүз. Болбосо, Бишкек шаарынын Биринчи май райондук соту 2006-жылы 15-сентябрында «Талибанды» террористтик уюм деп таап, Кыргызстандын аймагында анын иш жүргүзүшүнө таптакыр тыюу салган эле. Айтмакчы, Борбор Азиядан буга дейре Казакстан «Талибанды» өлкөнүн террорчул уюмдар тизмесинен өчүргөн.

Алишер ТОКСОНБАЕВ өз кабарчы