24 Бардыгы /

Президенттин Баткен облусундагы Өкүлү Абыкарим Алымбаев Лейлек районуна караштуу Жаңы-Жер айыл өкмөтүнүнүн тургундары менен жолугушту. Анын жүрүшүндө жергиликтүү тургундар турак жай салуу үчүн жер тилкесин берүү, жаштар үчүн жумушчу орундарды түзүү, Интернационал жана Оочу айылдарынын жолун оңдоо, Достук айылынын жолуна асфальт төшөө, көмүр баасын турукташтыруу маселесин катарынан көтөрүштү.

Ошондой эле тургундар республикалык бюджеттен Баткен облусун өнүктүрүүгө бөлүнгөн 500 миллион сомдун алкагында сугат суу берүүнү жакшыртуу боюнча долбоорлорду колдоп берүүнү суранышты. Облус башчысы Абыкарим Алымбаев бул боюнча айыл өкмөтү жана суу чарба мекемесинин башчысын, долбоор менен кабыл алуусуна барууну тапшырды. Анданы ары Жаңы-Жер айыл өкөмтү боюнча 280 гектар жерди трансформациялоо боюнча сунуш берүү үчүн документтери даярдалып жаткандыгы айтылды. Сунуш колдоо тапса, тургундарга жер тилкеси дагы берилет. Ал эми Интернационал жана Оочу айылдарынын жол маселеси, айылдар чек арага чектеш жайгашкандыктан, эки өлкөнүн чек арасын делимитациялоо боюнча комиссиянын макулдашууларына ылайык, чек араны тактоо иштери аяктаган соң, курулуш иштери жүргүзүлөт. Достук айылынын 2 чакырым жолуна асфальт төшөө боюнча айыл өкмөтүнө сунуш берүү тапшырылды. Райондук жана облустук өнүктүрүү фонддорунан каражат бөлүнүп, келерки жылы асфальттоо иштери жасалат. Ал эми көмүрдүн баасы боюнча облус башчысы, калкты көмүр менен камсыз кылуу боюнча тийиштүү тапшырмалар берилгенин, бааны туруктуу кармоо боюнча атайын баалар бекитилгенин айтып, айыл өкмөтү тийиштүү кызматтар менен бирге иш алып баруусун милдеттендирди.

Жолугушууда Лейлек районуна караштуу Жаңы-Жер айыл өкмөтүнүн эли быйылкы жылы аймакта сугат суу пайдаланууда жылдагыдай көйгөйлөр болбогондугун, жакшы шарттар түзүлүп, үзгүлтүксүз суу берилгендигин дагы айтышып, жергиликтүү бийлик өкүлдөрүнө терең ыраазычылыгын жолдошту. Ал эми Баткен облусунун башчысы Абыкарим Алымбаев суу чарба мекемесинин кызматкерин сыйлыкка сунуштоону жергиликтүү бийлик органдарынын башчыларына катуу дайындады.

Алишер ТОКСОНБАЕВ, өз кабарчы