3 Бардыгы /

Кыргыз Республикасынын эл артисти, ырчы, ОшМУнун профессору Жолболду Алыбаевдин «Дана кыз» китебинин бет ачар аземи өткөрүлдү. Иш-чарага Ош шаарынын мэри Жеңишбек Токторбаев, жергиликтүү бийлик өкүлдөрү, Айтматов таануучу, окумуштуу, академик, сынчы Абдылдажан Акматалиев, «Манас» жана Чыңгыз Айтматов улуттук академиясынын президенти Азиз Биймырза уулу, Кыргыз улуттук «Манас» театрынын директору Нурбек Талантбеков, ОшМУнун профессордук-окутуучулук курамы, студенттер жана ырчынын шакирттери катышышты.

Аталган адабий кечени Азиз Биймырза уулу алып барып, Жолболду Алыбаевдин чыгармачылык изи, ишмердүүлүгү, кыргыз маданиятына кошкон опол тоодой салымы туурасында кеңири кеп курду. Ал эми Ош шаарынын мэри Жеңишбек Токторбаев ырчынын адамдык бийик сапаты, чыгармачылыгы туурасында өзүнчө кеп кылып, жылуу куттуктоосун жолдоду. Калаа башчысы Керме-Тоо муниципалдык аймактык башкармалыгындагы 15-көчөгө Жолболоду Алыбаевдин ысымы ыйгарылгандыгын дагы кошумчалады.

Баса, «Дана кыздын» баш сөзүн жазган адабиятчы Абылдажан Акматалиев китепте Жолболду Алыбаевдин калеминен жаралган лирикалары, обону дагы, сөзү дагы өзүнө таандык болгон ырлары, дастандары, арноо ырлары жана автор иштеп чыккан обондуу ырлар топтолгондугун баса белгиледи: – Жолболду Алыбаев сөздүн накта чебери экен. Көз тийбесин! Китепте сөз менен обон шайкеш келген, төкмөчүлүк менен жазмакерлик төп келишкендигин дагы көрүүгө болот. Автор утурумдук кызыкчылыктарды четке кагып, өнөрдүн ысык-суугуна чыдап, дастанчы, санатчы, ырчы, акын, аткаруучу, обончу, педагог катары көп тармактуу ишмердүүлүгүн жүргүзүп келген. Китептин дагы бир өзгөчөлүгү  ырлардын электрондук нускасы QR код менен тиркелген.

Ал эми иш-чарада манасчы Рысбай Исаков «Манас» айтса, акындын шакирттери анын чыгармачылыгындагы обондуу ырларды катарынан ырдашты.

Жолболду Алыбаев «Дана кыз» чыгармасын аткарып, өмүрү, чыгармачылыгына салым кошкон инсандарга өзүнүн терең ыраазычылыгын билдирди: – Мен өзүм Ош мамлекеттик унивеситетинен билим алдым. 25 жылдан  бери ушул жерде гана эмгектенип келатам. Чыгармачылыгымдын өсүшүнө, ушул даражага жетишиме университеттин кошкон салымы абдан эле чоң. Окуу жайга абдан ыраазымын!

Жолболду Алыбаев ошондой эле «Дана кыз» китебин чыгарууга көмөктөшкөн Кыргыз улуттук «Манас» театрына, Чыңгыз Айтматов атындагы Тил жана адабият институтунун жамаатына терең ыраазычылыгын дагы кошо билдирди.

Айтмакчы, Жолболду Алыбаев көрүнүктүү ырчы, обончу, дастанчы, термечи, акын жана композитор. Ал Барпы Алыкуловдун сөзүнө жазылган «Өзгөчөм», «Мырзайым», ошондой эле өзүнүн сөзүнө жазылган «Чолпонум» ашыктык дастандары менен жумурай журтка таанымал. Булардан тышкары ыр, санат, дастан, жана термелерден турган үч жыйнактын дагы автору.

Алишер ТОКСОНБАЕВ, өз кабарчы